Endamê Komîteya Rayberdişî ya PKKyî Murat Karayilanî bi wesîleya serrhêra 26ine ya Komployê Mîyanneteweyî Stêrk TVyî rê qisey kerd û rojdem ercna.

Qiseykerdişê Karayilanî ra tayê noqtayê girîngî wina yê:

‘’Ez Komployê 15ê Sibate şermezar kena û şehîdanê ‘Şima Nêeşkenê Tîya ma Tarî Bikerê’ yad kena. Nê komployî 26 serrî xo pey de verdayî. Rayber Apo zî 26 serrî yo bi çêrî Îmrali de xo ver dano. Şarê ma, têgêrayîşê ma û Rayber Apoyî bi têkoşînê xo komplo pûç kerd. 

Şarê ma 15ê Sibate sey Roja Reşe pênase keno. Şarê ma amadekarîya çalakîyanê 15ê Sibate keno. Emser netîceya têkoşînê şarê ma de Rayber Apoyî de tayê pêvînayîşî ameyî kerdene û hêvîya prosesêkî vejîyaye werte. ’Rayber Apo emser wazeno ke Roja Reşe bikero sipî, bikero rojêka rinde ya azade. Ma pê bawer ê ke o 15ê sibate de veng bido. Welat û teberê welatî de ganî şarê ma 15ê sibate bikero asta xoverdayîşî ya tewr berze. Seba ke komplo bi temamî biqedo Rayber Apo wazeno a roje bikero roja destpêkê hemleyêka newîye. Hemleya newîye hemleya azadîye ya. Ma çapemenîye ra wina eşnawit ke Strasbourg de mîtîngêko pîl do bêro kerdene. Teber û zere de ma 15ê sibate de xoverdayîşî biresnê leweyî, bikerê roja azadîye, roja wayûbiratîye û demokrasîyî. Wa her kes bi girseyan tewrê çalakîyanê 15ê sibate bibo û bi hawayêkê normalî nêzdîyê na roje nêbo.

Alternatîfê têgêrayîşê ma her wextî ra zafêr ê. Ma hinî pêro dinya de şinasîyenê. Ma tena têgêrayîşêko çekdar ney têgêrayîşêko îdeoloj ê. Ma paştîya xo nêdana teberî ro, ma xo ra paştî gênê. Yanî ma zî terefêk ê. Îmkanê ma yê polîtîkî zî zêdîyayê. Hetê bînî ra ma, gerîlayî şer de aver şîyî. Dişmen rixmê çekan, droneyanê çekdaran, ÎHA-SÎHA, teknnîk û teknolojîya xo zî bi ma nêeşkeno. Axir yanî doktrînê ma yê şerî do bieşko ma biresnê serfîrazîye. 

Bahçelîyî vat ke ganî Rayber Apo Meclîs de qisey bikero. Ma dima naye ra fam kerd ke tay heyetê dewlete şîyê pêvînayîşê Îmraliyî. Xora di reyî heyetê DEM Partî Rayber Apoyî de pêvînayîşî kerdî. Dewlete vano haştîye wazena. La hetê bînî ra hêrişî dewam kenê. Haştîye bi qiseyan ney bi kerdişan yena. AKPyî hema tam bira xo nêdaya; sîyasetê xo yê qirkerdişî, tedayan û hêrişan rê dewam keno.

Îqtîdar teyna qiseyê çekverdayîşî keno. La na meseleya ma nîya, meseleya înan a. Seba haştîye ganî hêverî ziwan bêro vurnayene. Vanê ‘Wa Ocalan seba çekverdayîşî veng bido.’ Bi vengdayîşî no nêbeno. Bi des hezaran hêzê ma yê çekdarî est ê. Embazê ma fedayî yê. La ganî Rayber Apo raşta raşe embazan de qisey bikero. 

Ez bi xo gerîlayêk a la nêeşkena ke embazanê cepheyanê şerî rê vaja ke wa çekan war verdê. Seba ney ganî Rayber Apo bi xo bikewo dewre. 

Seba çekverdayîşî bira kongre lazim a. Ganî kongreya PKKyî bêra yewca û qisey bikera. Seba ney zî îradeyê Rayber Apoyî lazim o. Yanî yew prosesê îqnakerdişî lazim o û tena Rayber Apo eşkeno ney bikero. Coka ganî Rayber Apo azad bibo.

Tabî her çî ra  ver yew prosesê adirbirnayîşî zî lazim o. Heta ke adirbirnayîş nêbo ma do senî çekan war verdê? Ma seba haştîye ganê xo danê. Eke haştîyêka têdûşte bêra xora ma zî do mesuldarîyanê xo bîyarê ca. Wa her kes goreyê ney têbigêro. Bi ziwanê tehdît û şantajî zî haştîye do nêra. Ma hertim peyê Rayber Apoyî de yê. Qiseyê ey seba ma qîmetîn ê. La mesele tena mabênê dewlete û PKKyî de nîya. Ma dewamê Şêx Seîd, Seyîd Rizayî û Rindexane yê. Şer û haştîye zî pîya nêbenê. Coka ganî dewleta tirke bire bida.

Rayber Apo formulasyonêkê neweyî ser de vindeno. Yanî o tena çareserîyêka klasîke ser o ney komelêkê demokratîkî, têdûştî ser o fikirîyeno. Ganî pêro dormeyê Tirkîya û herême, partîyê muxalîfî, elewîyî, cinî û camêrdî her kes paştî bidê na hemleya Rayber Apoyî.

Tişrîn de Şerê Şarî yo Şorişgêr est o. Şarê ma paştî dano şerwananê xo. Ez çalakîya nobete ya Tişrînî selam kena. Mi verê cû roportajêk dabi ANFyî û mi vatibi ke performansê QSDyî xurtêr o. A nika dewleta tirke pê şerwanan nêeşkena. 

Dewleta tirke vera Îdareyê Xoserî yê Rojawanî û QSDyî gêrena îtîfaqanê xurtan bikera. Coka HTŞyî de pêvînayîşan kena. La HTŞ xurtêr nîyo û alternatîfê Îdareyê Xoserî qet nîyo. Dewleta tirke seba asayîşê xo ganî raşta raşte Îdareyê Xoserî de pêvînayîşan bikera. HTŞ û serekê ci Ehmed El Şara tena qiseyê kiştişî kenê; nê sey çeteyan têgêrenê. 

Sey têgêrayîş û şarî ma kewtî safhayêka newîye. Rayber Apo do 15ê sibate de eşkerayîyêka girînge û tarîxîye bido. Sey têgêrayîşî ma her îhtîmalî rê amade yê. Ma şerî rê zî amade yê. Nê xusûsî de meseleyê ma çin ê. La projeyê Rayber Apoyî hîna zaf stratejîk û girîng o. Ma peyê nê prosesî de yê. Ma her îxtîmalî rê zî amade yê. Ganî şarê ma Rayber Apoyî teqîb bikero. Ma têgêrayîşêko tecrubeyîn o. Coka ma na safha bikerê safhayêka serkewtişî, yewîya şaran awan bikerê û bi mesuldarî têbigêrê. Nê esasî ser o ez hêvîdar a ke roja 15ê Sibate de roja reşe do biba roja azadîye û demokradîyî. Ez her kesî rê serkewtiş wazenê.’’