Serekê Pêroyî yê AKPyî sernaryoyo  ke serê  kesanê ke erdlerzê Wan û Erdîşî de dinyaya xo bedilnaye, fîna dewre, keno ke Mereş û 10 bajaranê înan ê erdlerzî de bido domnayene.

Qezaya Erdîşî ya Wanî de 23ê teşrîna verên a 2011yî de bi girdîya 7.2yî erdlerz qewimîya, 604 kesan dinyaya xo bedilnaye, erdlerzê bi girdîya 5.6î de zî 40 kesan dinyaya xo bedilnaye. Bi hezaran kesê ke birîndar bîyî, ban û cayê karê înan rijîyayî. Îqtîdarê AKPyî ke Wan û Erdîş sey herêma afate îlan nêkerde, hetkarîya şarê herême zî nêkerd. Şarê ke îqtîdar protesto kerd raştê hêrişê AKPyî ame. Heme hetkarîya ke teber û zereyê welatî ra ameyî, hetê îqtîdarî ra ameye destsernayene. Şarê Wan û Erdîşî bi rojan binê vewre û şilî de mend û dima ra bajarnanê sey Amed, Cizîre, Mûş, Bedlîs û Îdirî yê Kurdîstanî de bi memanê keyeyan. Mexdûrê erdlerzê Erdîşî dima agêrayî memleketê xo.

Çim verda pereyê şarî

Erdogan û partîya ci ke herême nêkerde herêma afate çim verda pereyê mexdûranê erdlerzî. Di serî badê erdlerzî Wan/Erdîş de banê TOKÎ ameyî viraştene. Nê banî bi eştişê vicakî mexdûranê erdlerzî rê ameyî vilakerdene. Banê ke pê hetkarîya ke ameye, ameyî viraştene hetê îqtîdarê AKPyî ra bi vaya 80 herzar TLyî roşîyayî mexdûranê erdlerzî.  Şarê ke erdlerzî de gan û malê xo vînî kerd, na rey bi deyndarê dewlete û bankayan. Bi hezaran kesê ke bananê TOKî de ameyî cakerdene, seba ke nêeşkayî deynê xo bidê, îcra ame bananê înan ser, û banê bi seyan kesan destê înan ra ameyî girewtene. Nê banê  ke destê mexdûranê erdlerzî ra ameyî girewtene, roşîyayî kesanê bînan.

Eynî sernayo Mereş de dewre de yo

Îqtîdarê ke erdlerzê Ercîş û Wanî bi bananêTOKÎ açarna rantî, keno ke eynî senaryoyî 11 bajaranê bînan ke erdlerzê payênî da piro, tîya de bido domnayene. Îqtîdarê ke şar binê rijnayîşî de verda, cehd kerd ke verê hetkarîya ke yena bîgêro. Erdogan û ekîbê ci ke şar merg, serd, vêşanîye rê mehkum kerd, bi rojan  dima ameyî herêma erdlerzî. Erdoganî roja diyîne ya erdlerzî de vat ê do bananê TOKÎ virazê. Serekê AKPyî ke mîjdanê rantî dayî paştgêranê xo, keno ke senaryoyê rantî yê Wanî, Mereş û 10 bajaranê bînan ê erdlerzî de bîyaro ca. Goreyê nê senaryoyî semedê mexdûranê erdlerzî do banê TOKÎ bêrê viraştene. Banê ke do pê pereyê şarî bêrê viraştene do zaf vay bêrê rotene û mexdûrê erdlerzî bibê deyndarê dewlete û bankayan. Mexdûrê erdlerzî ke do nêeşkê deynê xo bidê do banê înan destê înan ra bêrê girewtene.