Dîwana Hevserekîye ya KCDK-E eşkerayîyêka nuştekîye weşanaye û pare kerd ke înan 'Hewteyê Xoverdayîş û Hêrsê Vera Kolonyalîzmî' îlan kerd. Dîwane da zanayene ke hewteyêkê bînî bêmabên çalakîyî do bêrê kerdene.

Eşkerayîye de wina ame vatene: ''Ma pê sloganê 'Her ca Kurdîstan, her ca xoverdayîş' do vera hêrişanê topyekûnan ê dewleta tirke pêro hewte xo ver bidê. Dewleta tirke bêmabên hêrişê Şingal, Mexmûr, Rojawan, Başûr û Vakurî kena. Nê hêrişî vera fîrazî, erj, rûmet û îradeyê ma yenê kerdene. Verê çimanê pêro dinya de dewleta tirke ya îşxalkere bi hawayêkê eşkera kurdan qetil kena. Dezgehê mîyanneteweyî vera nê hêrişan bêveng û bêtewir ê. Dewleta tirke zî naye ra hêz gêna.

Wext ameyo ke ma vera nê hêrişan wurzê payan ser, her ca de qîyamet ronê. ''

Goreyê eşkerayîye hewteyê bînî de nê çalakîyî do bêrê kerdene:

''Her roje ma saete 18:00 de meydanan de bibê.

-Roja sêşemeyî rayberîya ciwanan de çalakîyê demokratîk û meşrûyî her ca de do bêrê kerdene.

-Roja çarşemeyî verê parlamentoyan de hêrişê qirkerî do bêrê şermezarkerdene.Enternasyonalîst û dostê ci do tewrê nê çalakîyan bibê û dosyaya qirkerdişî do teslîmê pêro parlamentoyan bibê.

-Roja pancşeme û îneyî saete 18:00 de herêmanê pêroyînan de çalakîyê girseyî do bêrê kerdene.

-Yewîya Hêzî ya Demokratîke dezgehanê yewîya kurdan reyde û pê beşdarîya enternasyonelan peynîya hewteyî de pêro welatanê Ewropa, Kanada û Awustralya de do çalakîyanê pîlan bikerê.

-Roja çarşeme rayberîya êzidîyan de Hannover û dormeyê ci de rayraşîyayîşêk do bêro kerdene. Roja şemeyî pê beşdarîya Oldenburg-Bremenî Bremen de ma do nawnayîş bikerê.''