Komîteya Şaran û Bawerîyan a KCKyî derheqê erdlerzî de cewab da persanê ANFyî. Komîte semedê kesanê ke dinyaya xo bedilnaye serweşî û birîndaran rê şîfa waşt û nê vatî:

Îqtîdar do hesabê kerdişanê xo bido

''Berpirsîyara netîcayanê wird erdlerzan zî dewleta tirke ke tedbîrê erdlerzî nêgirewtî. Seba ke tedbîrê ke hewce kenê nêameyî girewtene, hende kesî ameyî qetilkerdene ke kiştox dewleta tirk a. Rixmo ke Kurdîstan û Tirkîya herêmê erdlerzî yê, qet tedbîrêk nêgirewt, cayê ke ganî tede banî mevirazîye rantî rê akerdî. Bêşik dewlete do miheqeq hesabê nê bido. Îqtîdarê AKP-MHPyî yo ke hende merdimî qetil kerdî, bajarê ke serûbin bîyî de hem înan rê hetkarî nêkerd û hem zî hetkarîya ke şina verê ci geno. Îqtîdarî reyna mojne ke senî dişmenê merdimî yo. Semedê hetkarîya şarî nê semedê nimitişê rîyê xo yê raştî bîyo seferber. Rixmo ke kiştoxê hende merdiman o, hema têna waştişê ci o yo ke emrê xo yê îqtîdarî derg bikero. Vano qey bi îlankerdişê Halê Îstîsna, tehdît û kiştişî xo bixelisno la se keno wa bikero do hesabê kerdişanê xo bido.

Îqtîdar elewîyan ê kurdan sey dişmenî vîneno

Seke yeno zanayene merkezê erdlerzî herême ke zafê înan de şarê kurd-elewî ciwîyeno yê. Nê cayan de şar hetê dewlete ra têna ame verdayene ke tim xo sey 'dewleta hêzdare' wasifnena. Dewlete hem hetkarîya şarî nêkerd hem zî verê hetkarî girewt. Şarê ma vano seba ke kurd û elewî yo, dewlete wina nêzdîyê ci bena ke no heqîqet o. Cunke dewleta tirke roja ronayîşê xo ra dişmenîya kurdan û elewîyan kena. Dewleta tirke vera nasnameyanê kurd û elewîyan têna  polîtîkaya qirkerdişî reyra bena. Seserrî yo kena ke kurdan û elewîyan çîn bikero. Coka dewlete kena ke erdlerzî sey firsetêkî bişuxulno polîtîkayanê xo yê qirkerdişî bîyaro ca. Îqtîdar şarê herême sey dişmenê ke ganî bêro çînkerdene, vîneno. Dewlete rîyê bêîmkanîye ra nê bi hewayêkê hişmendî, biplan şar têna verda ke polîtîkaya xo ya qirkerdişî bîyaro ca.

Şarê ma wa erdê xo cameverdo

Seke yeno zanayene 1978 de Mereş de qirkerdişo gird ame kerdene ke bajar kurd û elewîyan ra bêro pakkerdene. Hezarî ra zafêr kesî ameyî qetilkerdene û ê bînan rê zî vejîyayîşê teberî welatî ame ferzkerdene. Nika wazenê prosesê erdlerzî de polîtîkaya qirkerdişî, vengkerdişî temam bikerê. Seba ke şarê kurd-elewî erdî xo ra vejîyo, bîyî seferber. Hetkarî nêkenê, verê hetkarî genê ke wa şar mecbur bimano bar bikero. Cayê ke kurd-elewî tede yê wazenê veng bikerê û nê cayan de 'macîran' ca bikerê ke dewlete înan polîtîkaya qirkerdişî de sey aparat şuxulnena. Xora wextêk cuwa ver cayanê Mereşî ke tede temamî kurd û elewî est ê de, kampê macîran ê sunnî ereben ameybî ronayene.  Ganî şarê ma polîtîkaya qirkerdiş û îşxalî ya dewlete tirke ra hayîdar bo û herra xo cameverdo. Ganî bi xoverdayîşî wayîrê herre û kulturê xo vejîyo û polîtîkaya îşxalkere pûç bikero.

Ganî paştîdayîş bêro girdkerdene

Ganî şarê ma yê herêmanê bînan û heme hetê demokratîkî zî paştî bidê şarê kurd-elewîyan. Nika wextê pîlkerdişê paştîdayîşî yo, wextê piştişê birînan o. Ganî semedê wedaritişê cenazayan, peydakerdişê hewcedarîyanê lezabezan, çarekerdişê cayêmendişî seferberîye bêro girdkerdene. Ganî paştîdayîş hende gird bo ke şarê ma mecbur memano erdê xo cabiverdo. Semedê newe ra înşakerdişî paştîdayîş hewce keno. Eke komel bibo yew, çîyo ke meeşko bikero çîn o. Cunke hêzo tewr pîl komel o. Ganî dewlete ra çîyêk mero pawitene.  Sey hêzanê komelkîyan ganî her çî ma bi xo bikerê. Hetê bînî ra ganî ma vera dewlete û îqtîdarî têkoşîn bikerê ke berpirsîyarê nê rijnayîşan ê. Ganî ma pê têkoşînî hesab bipersê.''