Parlamenterê HDPyî Kemal Bulbulî derheqê erdlerzî de ANFyî rê qisey kerd. Bulbulî dîyar kerd ke, cayo ke erdlerz tewr zaf tesîr kerdo, Semsûr de, şar xo bêwayîr hîs keno û bale ante bi hezaran cenazeyan ke hema binê xirban de yê, sazgehê dewlete ne madî ne zî manewî hetkarî nêdaya.

Bulbulî wina behsê halê Semsûrî kerd: ‘‘Semsûr de bi hezaran însanî binê xirban de yê. Çi heyf ke seba ke dewlete nêeşkîya wextê xo de xo biresno ê kesan, trajedîyêka girde virazîyaye. Nika zî yena vatene ke hema binê xirban ra veng yeno la nê wextî ra dima zaf zehmet o. Heta nika AFAD, şaredarî û sazgehê dewlete ne hetê madî ne zî manewî ra hetkarîya înan nêresaya şarê Semsûrî

‘Şar xo ewle de hîs nêkeno’

Bulbulî wina dewam kerd: ‘‘Komel xo ewle de hîs nêkeno. Hetê weşîye ra hîzmetêk çin o. Ewro ez şîya nêweşxaneyê Semsûrî û hekîmê uca yî vat zafîya mexdûran organê xo vindî kerdî. Xora hema hetkarî nêresaya tay dewe û qezayan zî. Ma sey HDP û bi rêxistinanê demokratîkan ê tîyayî ameyî têhet û koordînasyonêk awan kerd û masaya krîzî da ronayene.

Trajedîyêka girde

Bulbulî dîyar kerd ke masaya krîzî, HDP û rêxistinanê demokratîkan ra awan bîya û wina dewam kerd: ‘‘Vizêrî şaredarîya ma ya Çinarî ameye û Cemxaneyê Yenîmahalle de mitbaxêk afirna. Reya yewine ma vizêrî şan, werdêko germ werd. Ma sey şarê kurd zaf bîyî şahîdê trajedîyan la na trajedîyêka hîna gird a.’’