Keyeyêkî ra 35 kesî erdlerzî de merdê
Erdlerzê 6ê sibate ra dima se ra 80ê Semsûrî êdî nêyeno ciwîyene, bi des hezaran însanî merdê. Tay keyeyî zî bi desan nas û merdimê xo vindî kerdî. Keyeyê Filikî zî 35 merdimê xo dekerdê binê herre.
Keyeyê Filikî ra Şêxmûs Filikî û merdimanê ci yê nêzdîyan ra Alî Dere, behsê felaketa ke ciwîyayî, kerde.
Şêxmûs Filikîyî dîyar kerd ke wextê erdlerzî de o Amed de bîyo û ameyo vatene ke xebatê gêrayîş û xelisnayîşî zaf erey ameyê kerdene.
Ma cenazeyê xo dayî herre
Filikîyî wina dewam kerd, ‘‘Ma bi îmkananê xo nas û merdimê xo binê xirban ra vetî û dayî herre. Nika ez qet nêeşkena çîyêkî bifikirîya û nêzana ke ma do nika ra dima zî se bikerê, qet planêkê ma çin o. Ma bi zerrîya xo nêeşkîyayê şînê xo zî bikerê. Ma bi destanê xo 35 kesî vetî û dekerdê binê herre. Û hema zî binê xirban de cenazeyê ma est ê.’’
Ma bi îmkananê xo xirbî hewanayî
Alî Dereyî zî dîyar kerd ke ê wextê erderzî de hewn de bîyê û reyêk de dêsê banê înan înan ser o rijîyayo û wina dewam kerd, ‘‘Ma yewbînî verare kerde û ma nêeşkîyayê bivejîyê teber. Ceyran şîybî û varan varayêne. Ma bi destanê xo xirbî hewanayê qet ekîbêke nêameye. Şar pêro merdimê xo bi îmkananê xo vetî, ma 2 cenazeyê xo vetî û 6 7 kesî zî birîndar xelisnayî. Ma bi xo heqê kepçeyan da. Yeno vatene ke Semsûr de 32 hezar însanî merdê.
