Konseya Rayberdişî ya KNK’yî derheqê hêrişê dewleta Tirkî yê vera  Başûrê Kurdistanî de eşkerayîyêk daye û Kurdî hîşyar kerdî.

Eşkerayîye de ca dîna nînan: ‘’Dewleta Tirkî ya ke Vakûrê Kurdistanî îşxal kerdo nika zî wazena ke Başûr û Rojawanî îşxal bikero. Vera Başûr û Rojawanê hêrişê îşxalî yenê kerdene. Dewleta Tirkî ya ke seba ke destûr nêdo Rojawan bireso Deryayo Sipî Cerablûs ra heta Ezaz û Efrîn xeylî cayî îşxal kerdî nika zî bi stratejîya neweye hêrişê Başûrê Kurdistanî kena. Bi na hemleya neweye ya îşxalî wazenê ke  qismêkê Vakur, Rojakewtene, û Başûrê  Kurdistanî  yewbînan ra raqilnê û Bradost û Xakurkê de ca bidê xo û nê cayan de mende bê. Nê hêrişî sey xençer zerrîya Kurdistanî rê ameyî pirodayene. Eşkerayo ke heme Kurdistan binê tehlukeyî de yo. Eke no senaryo ser bikewo no beno qiyametê Kurdan. Vera hêrişanê dişmenan ganî heme Kurdî lezûbez  bi zanayîşê yewîya neteweyîye reaksîyon bidê û pêro pîya tê bigêrê. Çi heyfo ke sere de hukmatê Herêma Kurdistanî hêzanê Başûrî ra veng nêvejîyeno. Na bêvengîye paştî dana dişmenî. Ganî heme hetê neteweyî û welatperwerî bi tewirê hemparî vera îşxalî vengê xo berz bikerê. No wezîfeyêko neteweyî yo û ganî ewro cade bêro bicaardene. Siba beno ke zaf erey bo. ’’