Kongreya Neteweyî ya Kurdistanî (KNK) encamnameyê kombîyayîşê tewirê neteweyî yê hemverê îşxalê dewleta Tirkî vila kerd. Kombîyayîşê tewirê neteweyî yê hemverê îşxalê dewleta Tirkî 27’ê Temmuze de paytextê Belçîka Bruksel de amebi viraştene.

 Encamnameyê kombîyayîşî ra tayî cayî wina yê:

“Serê vengdayîşê Komîteya Dîplomasî ya Hempare ya partî û organîzasyonanê sîyasîyan ê Kurdistanîyan de binê sîwanê KNK’yî de ke 34 partî û organîzasyonan ra yeno pê, pîya bi temsîlkaranê bi desan partî û organîzasyonanê Kurdistanîyan tarîxê 27.07.2019 de Bruksel de Kombîyayîşê Tewirê Neteweyîyî yê Hemverê Îşxalê Dewleta Tirkî ame viraştene.

Seke yeno zanayene nê 30 serranê peyênan de welatê ma halêkê neweyî dir têrî yo û serra 1991 de Başûr de û dima ra zî Rojawanê Kurdistanî de di îdareyê xoserî bica ameyê. Ma rind zanê ke ne Îran û ne zî Tirkîya çi rey nê statuyê Kurdan qebul nêkerdê û her tim waşto ke bi çi hawayî beno wa bibo, nê statuyan xira kerê, eke înan ra nêro zî bêtesîr verdê û bikerê binê ablûkaya polîtîk, leşkerî û ekonomîke. Nê prosesî de Îranî ge-ge bi bêvengî, reyan zî bi hêrişanê eşkereyan problem vetî. Başûrê Kurdistanî de xeylî reyan kampe û bargehê partî û organîzasyonanê rojakewtena Kurdistanî yê Koyê û serê sînoran bombardûman kerdî û bi desan kesî kiştî, şehîd kerdî. Nê rojanê peyênan de zî ancî hêzanê Îranî hêrişê Başûrê Kurdistanî kerd.

Dewleta Tirkî ya ke Vakur de Zilmêko Giran Kena, Wazena Başûr û Rojawan Îşxal Bikero

Dewleta Tirkî sey îşxalkarêka pîle, hetêk ra mîyanê sînoranê xo yê fermîyan de zulmêkê pîlî şarê Vakurê Kurdistanî ser o kena, hetêna ra zî çimê xo veradayo perçeyanê başûr û rojawanê Kurdistanî û dest bi îşxalê hîrayî kerdo. Dimayo ke rojawanê Kurdistanî de îdareyo xoser virazîya, dewleta Tirkîya konseptê hêrişkarîya xo kerd newe û plane xo yê îşxalkarîya pêroyîye da destpêkerdene. Ezaz û Cerablûs ra dest pêkerd û tewr peynî zî Efrîn îşxal kerd. Nika zî amadekarîya îşxalkarîyêka hîrayêre kena û verê xo dayo Kobanê, Girê Sipî û Cizîre ya Rojawanî. No pozîsyonê dewleta Tirkî ya hêrişkar û îşxalkare bi hawayêkê xeylî aktîfî dewam keno. Dimayê îşxalê Efrînî dewleta Tirkî bi hawayêkê sîstematîkî Efrîn de sûcanê teberê merdimîye bica ana. Demografîya Efrînî vurnena û dewlemendîyanê serê erd û binê erdî talan kena. Seba hemverê hêriş û îşxalî de tedbîrî bêrê girewtene, ma sey beşdaranê kombîyayîşî veng danê KCK, PDK, YNK û heme hêzanê Kurdistanî ke rew bêrê têhet û hemverê îşxalî de tewirêkê hemparî ramojnê."