Serekwekîla Grûba DEM Partî Gulîstane Kiliç Koçyîgîte kombîyayîşê çapemenîye yê meclîsî de rojdem erjna.

Koçyigite qiseykerdişê xo de bale ante tecrîdê serê Rayberê Şarê Kurdî Abdullah Ocalanî ser û vat:  Çalakîyê grevê vêşanîye yê tepişteyan di mengî xo dima verda. Nê grevê vêşanîye qey yenê kerdene? Ma zaf rey nê kursîyan de vat, 15ê adara 2021yî ran ata pêvînayîşê Îmraliyî nînê kerdene. Ne keyeyî ne avûkatî eşkenê pêvînayîş bikerê. Ma sey wekîlan wazenê şirê Îmraliyî la ma zî nêeşkenê şirê. Tam îzolasyon est o. Halê tecrîdî yeno ciwiyayêne. Naye sero tepişteyanê sîyasîyan dest bi grevê vêşanîye kerd. Ê cehd kenê ke vengê xo bidê eşnawitene.

Ma do mabnê 1-15ê sibate de Rayraşîyayîşê Azadîye bikerê. Rayraşîyayîş do hetan ra Wan û Qersî ra bêro kerdene. Bi nê rayraşîyayîşî do newera veng bidîyo meclîsî ke wa semedê azadîya Birêz Ocalanî  û çareserkerdişê meseleya kurdan înîsîyatîf bigêro xo ser. Walîtîya Qersî bado ke xebera rayraşîyayîşî girewt cade qerarê qedexeyî yê çalakîyan seba panc rojan girewt. Ma nê qerarî şermezar kenê.

Nê serd û sipîrî de êyê ke  semedê haştîye, demokrasî û azadîye rayraşîyayîş kenê, semedê ameyoxê welatî destê xo kena binê kerra. Krîmînaîzekerdişê rayraşîyayîşî ecizîye ya. Ma reyna vanê, se beno wa bibo ma do nê rayraşîyîşî bikerê. Ma veng danê heme hetanê demokratîkan ê Tirkîya ke wa veng bidê vengê haştîye. Sey nan û awe ma hewceyê haştîye yê.''