Nê demanê peyênan de, çarçewaya hêriş û îşxalî yê dewleta Tirkî yê serê Başûrê Kurdistanî de selahîyetdarê Îran û Tirkîya nê hewteyî de di reyî cemêyayî. Vejîya werte ke kombîyayîş de derheqê asayîşê sînorî û babetê bînî ameyê qiseykerdene.
Hetêk ra ke hêrişê dewleta Tirkî yê serê Başûrê Kurdistanî dewam kenê, hetêna ra selahîyetdarê Tirk û Îranî nê demanê peyênan de xeylî reyan kombîyayîşanê asayîşî virazenê. Peyê nê kombîyayîşan de yeno vatene ke tîcaretê serê sînorî yê beranê sînorî yê ke ameyê qedexekerdene esto. Hema hema şar hendî nêeşkeno berê sînorî de tîcaret bikero.
Amacê nê kombîyayîş û tedbîranê dewleta Tirkî û Îranî o yo ke şarê Kurdî mehkûmê feqîrîye bikerê û merdiman herême ra vejê.
Hewteyêk de Di Kombîyayîşî
Temmuze de rayedarê di welatan hewteyêk de di reyî cemêyayî. Mabênê heyetanê Tirkîya û Îranî de kombîyayişo ewilên 3’ê Temmuze de ame viraştene. Kombîyayîşo ewilên bajarekê Esendere yê Geverî de ame viraştene.
Kombîyayîş mabênê heyetê Tirkî yê bi serekîya walîyê Colemêrgî Îdrîs Akbiyik û heyetê Îranî yê bi serekîya komîserê Sînorê Ûrmîye Serheng Elî Pûrî de virazîya. Kombîyayîş de heman wextî de qeymeqamê Şemzînanî Muhammet Fuat Turkman, wekîlê fermandarê Tugaya Hidûtî ya 34'ine serhengê pîyadeyan Sûat Arabayapan, midûrê Asayîşê Bajarî Sûvat Dîlberoglû, hetkarê fermandarê Cendirmeyê Bajarî serheng Bûrhan Aydin, fermandarê Alaya Hidûtî ya 7'ine serhengê Komandoyan Hasan Koyûncû, midûrê Herêmê yê Gumruk û Tîcaretî yê Anatolîya Rojakewtene Hayrettîn Yildirim û midûrê Îdareyê Koçî yê Bajarî Cîhat Yildirim Çakar hazir bîyê.
Kombîyayîşo dîyin zî bi nameyê „Kombîyayîşê Asayîşî“ 10’ê Temmuze de walîtîya Colemêrgî de virazîya. Nê kombîyayîşî de zî Tumgeneral Metîn Tokel, qeymeqamê Geverî Ramzan Kenduzer, yê Şemzînanî Muhammet Fûat Turkman, Tûxgeneral Nûrî Ozturk, midûrê Asayîşê Bajarî Suleyman Sûvat Dîlberoglû, midûrê Herêmê yê Gumruk û Tîcaretî yê Anatolîya Rojakewtene Hayrettîn Yildirim, midurê Îdareyê Koçî yê Bajarî Cîhat Yildirim Çakar û heyetê Îranî hazir bîyî. Çimeyanê cayîyan ard ziwan ke kombîyayîşî hemverê şarê Kurdî de ameyê viraştene.
Çimeyan ra yewî vat ke herême de şerêko pîl esto, Colemêrg de heme sînor bîyo herêma qedexeye. Heman wextî de vat ke bi nê şerî tîcaret qedîyayo û amacê înan o yo ke şarî herême ra vejê teber.
