KON-MED: Newroza Almanya do Frankfurt de bêro kerdene

KON-MEDî eşkera kerd ke emser Newroza merkezî ya Almanya do bajarê Frankfurtî de bêro kerdene.

Konfederasyonê Komeleyanê Kurdîstanijan ê Almanya  (KON-MED) bi eşkerayîyêke da zanayene ke  Newroza merkezî ya Almanya 25ê adara 2023yî roja şemeyî do Frankfurt de bêro kerdene. Eşkerayîye de dîya zanayene ke  semedê Newroze destûr ame girewtene û ame vatene ke komîteya amadekarîye ya Newroze kombîyayîşê xo Darmstad de kerd û amadekerîyê şayîye merheleya peyêne de yê.

Eşkerayîye de nê ameyî vatene:

''Roşanê neteweyî yê kurdan de ganî şarê ma pê kincanê xo yê kurdîstanî meydanê Newroze pirr bikero. Bitaybetî cinîyî ganî pê kincanê xo yê neteweyî tewrê Newroze bibê. Newroza 2023yî do bi şîarê 'Wextê Rayberîya Azade û Kurdîstanê Azadî ameyo' bêro kerdene. Seke yeno zanayene vera Rayber Apoyî sîstemê qirkerdişî yê tewr pîlî yê tarîxî yeno caardene. Pê sîstemê qirkerdişî şarê kurdî bêîrade yeno verdayene, cuyeya azade destê ci ra yena girewtene. Vera sîstemê Îmrali û tecrîdî têkoşînê tewr pîlî Rayber Apo dano.  Şer û xoverdayîşo tewr pîl Îmrali de yeno dayene. Na çarçewe de têkoşîno ke dormeyê Rayber Apoyî de çend şino girdêr beno, ganî Newroze de dahîna zaf bêro wayîrvejîyayene. Slogana Jin, Jiyan, Azadî ewro sere de Kurdîstan heme Rojhelatê Mîyanênî û dinya de vila bîya.  Coka Newroze semedê heme şaran bîyo roşanê têkoşîn, ganîbîyayîş û azadîye.

Ma sey KON-MEDî pê bawer ê ke şarê ma nika ra do dest pê xebatanê Newroze bikero. Na çarçewe de Newroze de do şarê ma bi şîarê 'Wextê Rayberîya Azade û Kurdîstanê Azadî ameyo' warê Newroze pirr bikero û waştişê azadîye bîyaro ziwan.''