Kongreya Îdareyanê Xoseran û Herêmîyan a Konseya Ewropa raporê seba çareserkerdişê meseleyanê girîngan ê wextê weçînayîşanê pêroyîyan û herêmîyan ê Tirkîya qebul kerd.

Rapor 31ê adara 2024î de hetê raportoranê Tirkîya David Eray û Vladimir Prebilicî ra amebi amadekerdene. 

Heyetê Pêroyî yê kongre de temsîlkarê DEM Partî, CHP û AKPyî zî tede temsîlkarê welatanê cîyayan zî est bîyê. Kongre de babetê sey azadîya çapemenî û fikran, tepişîyayîşê temsîlkaranê kurdan, heqanê cinîyan û têdûştîya heqanê merdiman rojdem bîyî.

Rapor de ame parekerdene ke hukmatê tirkî weçînayîşanê herêmîyan ra dima qeyûmî erşawitê Kurdîstanî û no goreyê krîteranê demokrasîyî yê Kongreya Îdareyanê Xoser û Herêmîyan nîyo.

Raportoran ard ziwan ke seba caardişê biranê netîceya raporî ê do menga kanûne de pêşnîyazanê çareserîye amade bikerê. Bire dîyaye ke seba caardişî rapor do bierşawîyo Anqara, hetê Komîteya Wezîran a Konseya Ewropa û Meclîsê Parlamenteran ra zî bierşawîyo.

Rapor de dîya zanayene ke wextê weçînayîşanê 31ê adare de sey azadîya xoîfadekerdişî, sînordarkerdişê raydayîşî ûsn. kêmasîyê girîngî est ê, hûrmet nêameyo mojnayene îradeyê şarî, partîyanê îqtîdarî kampanyaya xo de pozîsyonê dewlete şuxilnayê, qeyûmî tayîn bîyê û çimdarîyê weçînayîşan ameyê astengkerdene.

Rapor de ame parekerdene ke ganî Tirkîya nê çîyan bîyara ca:

Qanûnê weçînitoxan û weçîniteyan wa zelal bibê, qedexeyê vera azadîya fikran wedarîyê, heqê raydayîşê leşkeran sînordar bibo, kampanyayê weçînayîşan wa edîl bibê, seba xoserbîyayîşê YSKyî wa tedbîrî bigêrîyê.