Paytextê Kibrisî Lefkoşa de bi sernameyê 'Binê Versîya Şerê Dinya yê Hîrêyînî de Kibris û Kurdîstan' û 'Polîtîkaya faşîzme ya Îmraliyî û bêvengîya Ewropa' de konferansêk ame kerdene. Bi seyan avûkat, wekîl, nuştox, rojnameger û aktîvîstî zî beşdarê konferansî bîyî.

Salona konferansî de fotografê Rayberê Şarê Kurdî Abdullah Ocalanî ameyî daliqnayene.

Konferans serkêşîya Merkezê Kulturê Kurdan ê Teofilosî û Yewîya Avûkatanê Demokratîkan a Kibrisî de ame kerdene. Hêverî avûkat Efstatios Efstatioyî qisey kerd û vat: ''Çareserîya meseleya kurdan, meseleya Kibrisî û azadîya Ocalanî pabesteyê pê yê.''

Siyasetmedar Lezgîn Serhatî ard ziwan ke nê konferansî torrêka xurte ya têkoşînî afernayo û vat: ''Ma eşkenê pîya dêsanê Îmraliyî birijnê.''

Roniştişê diyînî de Pisporê Jeopolojî Christov Iakaouvu û Alekos Mihalides û rojnameger Sefkan Kobanêyî qisey kerd.

Mihalidesî qalê xoverdayîşê gerîlayan kerd û bale ante ser ke azadîya Adbullah Ocalanî seba çareserîya meseleyan do biba gamêke.

Sefkan Kobanêyî îfade kerd ke paradîgmaya Abdullah Ocalanî de yewperestî, neteweperestî, nîjadperestîye çin a û vat: ''Na paradîgma xeyal nîya û nîşaneya ci ya tewr pîle Şorişê Rojawanî ya.''

Christov Iakaouvuyî pare kerd ke muxatabê çareserîya meseleya kurdan Abdullah Ocalan o.

Roniştişê hîrêyînî de avûkatanê Rayberê Şarê Kurdî Abdullah Ocalanî ra Îbrahîm Bîlmezî bi Skype qisey kerd.

Endamê Meclîsê Wekîlan ê Konseya Ewropa û avûkat Costis Efstatioyî bêvengîya Ewropa ya vera tecrîdî şermezar kerde û rexne kerde.

Avûkat Dinos Paspalidesî qisey kerd ke ganî warê mîyanneteweyîyî de paştî bêra dayene têkoşînê şarê kurdî.