Vervatoxê HDP’yî Gunay Kûbîlayî banê Merkezê Partîya xo de eşkerayîya çapmenîye daye û rojdem ercna.

Qiseykerdişê Kûbîlayî ra tayî cayî wina yê: ‘’24’ê Temmuze de reyna şaredarîyanê ma rê hêriş ame kerdene. Hemşaredarê Nisêbînî Ferhat Kût û hemsereka Bismilî Gulşen Ozere û endamê meclîsanê şaredarîye yê ma hema nezaret de yê. Eşkerayo ke îqtîdar semedê binkewtişê weçînitişê 31’ê Adare û 23’ê Hezîrane HDP’yî berpisîyar vîneno û wazeno qesasê naye bigêro. Ma tîya ra reyna vanê ke tabloyê nê weçînitişan eserê AKP’yî yê 17 serran o. Coka ma tîya ra veng danê îqtîdarî ke wa embazanê serbest veradê û destanê xo yê bişidetî serê şaredarîyanê ma ra biancê. Ma reyna rayapêroyî ra zî wazenê ke wa vera  nê hêrişan bêveng menanê. Semedê vervejîyayîşê şidetê serê Kurdan hewce nêkeno ke çew Kurd bo. Polîtîkayê nîjadperestî yê AKP’yî şaran verdano yewbînan. Tewr peynî de turîstê ke Başûrê Kurdistanî ra şîyî Trabzon rîyê beyraqê Kurdistanî ra şatê hêrişî ameyî. Vera Kurdan hêrişê nîjadperestî çend şino zêdîyenê. Reyna bextwaştoxê Sûrîye zî raştê nê hêrişan yenê.Hetêk ra vanê zalim Esed hetêk ra zî bextwaştoxan peyser şawenê Îdlîb, herêma şerî. Na dirîye ya.

Hêrişê ke ewro yenê kerdene bêno ke siba sebebê merganê girdan bê. Ganî ma vera nê hêrişan vengê xo berz bikerê. Hukmat semedê bêçareyîya xo yê zereyê welatî binimno, herêmanê Rojawan û Başûrê Kurdistanî rê sewqîyatanê sîlehan û operasyonan keno. Hêrişê eskerî yê vera Rojawanî DAÎŞ’î do newe ra  ganî bikero. Nê îqtîdarî ke Tirkîya de cayê ciwîyayîşî nêverdayo teberê zext, hêriş û tehdîtan de çîyêko bîn nêzano. Ma vera polîtîkaya şerî yê îqtîdarî Başûrê Kurdistanî ra heta Rojawanî her cayî do biaçarnê coğrafyaya haştîye. Ferqê ma û îqîtîdarî no yo, ma haştîye ê şer wazenê. Ma do heta peynî rêza xo ya haştîye ca nêverdê.''