Heyetê Rayberîya Merkezî ya HDP’yî seba ercnayîşê  netîceyanê weçînayîşî ameyî têhet. Mabênê kombîyayîşî de vervatoxê HDP’yî Gunay Kûbîlayî eşkerayîye daye çapemenîye.

Kûbîlayî ard vîrî ke, dimayê weçînayîşê 31'ê Adare AKP-MHP'yî metropol û şaredarîyê bajaranê girdan ê ke qeyûmî tayîn kerdê vîndî kerdî û vat, “Bajaranê Kurdan de qeyûmî cayanê ke ameyê, reyna ameyê şawitene bi uca.”

Kûbîlayî ard ziwan ke Ekrem Îmamoglû bi ferqêka berz a rayan ser kewt, bi nameyê HDP’yî ci rê serkewtiş waşt û vat, “Mîyanê derbe û demokrasî de o yo ke serk kewt demokrasî yo. Şarî bi rayêka girde reaksîyonê xo nîşan da.”

Kûbîlayî da zanayene, weçînayîşê Stenbolî de blokê serdestdarîye, ziwanê înan ê şerî û dişmenîye, hetê bînî ra nêzdîbîyayîşê mîlîtarîst û polîtîkayê îşxalkarîye bin kewtî û vat, “Êdî Tirkîya mecbûr a ke polîtîkayêka herêmî û aşitîyane bikera xo ver.”

Kûbîlayî ard ziwan, ha pêşnîyaza Birêz Ocalanî ya ke bi mektuba xo da zanayene, ha zî tifaqa demokrasî ya ke HDP pêşnîyaze keno, zemînê çareserîye afernenê û vat, “Tirkîya mucbûra ke aşitîye biaferna û probleman bi çek û şîdet ney, bi rayîrê muzakeraya demokratîke û sewîyeya cimatê hemdemî de çareser bikera.”

Kûbîlayî da zanayene ke, her cumle û vatişê Ocalanî yê Îmraliyî ganî bi seranserî ney, bi polîtîkayanê partîye ney, ganî bi perspektîfêkê tarîxkî bêrê ercnayene û sey firsetêkê bêrê dîyayene.

Gunay Kûbîlayî vat, “Şarê Kurdî weçînayîşê Stenbolî de reyêka bîna nîşan da ke mûxatabê çareserîya problemê Kurdî Birêz Ocalan o. Coka  ganî Birêz Ocalanî reyde pêvînayîşî bêrê kerdene, munaqeşeyî bêrê kerdene û nuqtaya optîmûmî de rayîrê çareserîye bivînê. Ganî goreyê ferasetê têduştî û azadîperwerî ya şaranê Tirkîya çareserîye bêra peydakerdene.”

Kûbîlayî da zanayene ke na babete de wezîfeyêkê muhîmî kewenê vileyê parlamentoyî û ganî parlamento lezabez bikewo dewre.