Kurdê ke Trabzon de raştê hêrişî ameyî, ameyî destbendkerdene
Qefleyê Turîstan o ke Başûrê Kurdistanî ra şi Trabzon, raştê hêrişî ame û 9 kesê ke raştê hêrişî ameyî bado zî ameyî destbendkerdene.
Qefleyê Turîstan o ke Başûrê Kurdistanî ra şi Trabzon, raştê hêrişî ame û 9 kesê ke raştê hêrişî ameyî bado zî ameyî destbendkerdene.
Bi desan kesanê ke Herêma Kurdistanî ya Fedareye ra semedê gêrayîşî şîyî Ûzûngolê qezaya Çaykara ya Trobzonî, raştê hêrişê faşîstan ameyî.
Qefleyê tûrîstan ê 50 kesan o ke tede domanî zî bibî bi sebebo ke tayînan de egala ke ser o Kurdistan nuşteyo esta, ê raştê hêrişî ameyî. Hêrişo faşîst derûdorî ra pê telefonan ame qeydkerdene. Yeno vînayene ke kesa ke dîmenî ancena a zî nêngan çînena û heqaret kena. Badê hêrişî Walîtîya Trabzonî da pêhesanyene ke 9 kesê ke raştê hêrişî ameyî, ameyî destbendkerdene û derheqê înan de tehqîqat ameyo destpêkerdene. Hêrişkaranê faşîstan ra kesêk nêame destbendkerdene.
Rojek cuwa ver zî Sakarya de lînçêko faşîst amebi ciwîyayene. Hemsereka ÎHD’yî avûkate Eren Keskîne dabi zanayene ke Kurdêko eskerîya bizore keno Sakarya de raştê lînçî ameyo.
Kulturê lînçî yê faşîstî Tirkîya de tim Kurdan hedef gêno. Kurdî rîyê vatişê deyîra Kurdkî, qiseykerdişê Kurdkî ra ya zî teyna rîyê Kurdbîyayîşî ra xeylî rayî raştê hêrişî ameyî û ameyî qetilkerdene.
Trabzon û Sakarya zaf rayî bi hêrişan ameyî rojdem. 16’ê Kanûn a 2018’î de Sakarya de netîceya hêrişê faşîstî de Kadîr Sakçi cuya xo vînî kerdebî û lajê ci Bûrhan Sakçi bi giranî birîndar bibi. Par Amedsporo ke şi Sakarya o zî raştê hewldayîşê lînçî amebi.