Wekîla HDPyî ya Mersinî Fatma Kurtulana ke Bazarcixê Mereşî de ANFyî rê qisey kerd.

Fatma Kurtulan vîst vîrî ke xeylêk cayan de erdlerzî ra şar zirar nêvîneno û vat: ''Tirkîya de pîsporî tim hîşyar kenê, vanê ganî tedbîrê lezabezî bêrê girewtene la selahîyetdarê dewlete goş înanê nêkewnê û çîyo ke hewce keno nêkenê. Tirkîya de sektorê înşaatî bêkontrol o. Ma persenê, vanê pereyê erdlerzî sera şi, cewab çîn o. Cuya merdimî xeymê îqtîdarî de nîya, aye ro tedbîran nêgeno. Roja verêne ra ma sey HDPyî mucadele kenê. Her keso ke mucadele kenê hêzo pîl teqdîm keno. Hem zerrîwazî û hem zî zexîre yeno la dewelete çîn a. Hemwelatî bi xo vanê 'ma dewlete nêdî.'

Ma gama ke ameyî Semsûr, serê xirban de yew di polîsî û wezîfedarê AFADî dîyî ke hêzê înan semedê xelisnayîşê ganî nêvetêne. Merdimê ke erdlerzî ra nêmerdî, serdî ra merdî. Xirban ser tewr zaf vengê lawikan beno berz. Xebata xelisnayîşî çîn a. Dewlet pîya bi dezgehanê xo tîya çîn a. Înanê ke ganê xo xelisnayo, vêşan têşan teber de yê. Her kes heta zanîyê ci bîyo hît latim, binateyê vewre de yo. Bi rojan o hema semedê mexdûran cayêmendişî, pawitiş û germbîyayîşî çîn o. Şaredarîya HDPyî çorbaya germin vila kerd. Pê paştîdayîşê kurdanê herêmanê bînan, dostan şar payra yo. Na dewlete nêeşkaye nan û awe zî biresno hemwelatîyanê xo. 

Badê erdlerzî Halo Îstîsna qey yeno îlankerdene? Hema derdê qedexeyan de yê. Herinda xelisnayîşê şarî de, verê çapemenî, verê ma genê, vengê muxalefetî birnenê. Wextê winayênî de polîsîberê hemwelatîyan cinenê vanê 'bêrê îfade bidê' Wîna rezîl yew sîstem o.''