Servîsê asayîşî û îstîxbaratî yê dewleta Tirkî seba ke sîyasetmedar, îdarekarê partîyan û xebatkaranê Têgêrayîşê Sîyasîyî yê Kurdan bişopnê metodanê neweyan şuxulneno. Na rey bi cîhazêk ke qaso ke bikewo zereyê desrê merdiman qijkek o û ca tespît keno sîyasetmedar û welatperwerê Kurdî ameyî şopnayene.

 Yeno vatene ke no cîhaz zafane peyê wesayîtan de bi rayîrê miqnetîsî yeno pawakerdene. Bi saya nê cîhazî ke tede kartêko qijkek ê qeydkerdişî û GPS (Sîstemê cayî yê globalî) esto, yeno tespîtkerdene ke ê kesî kamca yê, key kamcîn rayîrî ra ravêrtê. Goreyê hayîyan, xusûsen sîyasetmedarê ke wextêko derg zereyê sîyasetê Kurdî de ca girewto û yê ke newe tewrê ci bîyê bi rayîrê nê cîhazî ameyê şopnayene.