Wezîrê Pawitişî yê Îngilîstanî John Healeyî 14ê teşrîna peyêne de şi Anqara û Yaşar Gulerî reyde TUSAŞ zîyaret kerd. Sekreterê NATOyî Mark Rutte zî 25ê teşrîna peyêne de TUSAŞ zîyaret kerd.

Serekê Rêxistina Îstîxbaratî ya Îsraîlî Shin Bet Ronen Barî 18ê teşrîna peyêne de Serekê MÎTî Îbrahîm Kalinî reyde pêvînayîşêko nimitkî kerd.

Goreyê mi no trafîk seba pêşkêşkerdişê kodanê serebûtan qewimîyeno beno ke qîm nêbo.

Rixmê nê serebûtan zî kurdan û dostanê înan çar hetanê dinya de serrgêra 46ine ya ronîyayîşê PKKyî bi coş û kelecanêkê pîlî fîraz kerdi paytextê Îngilîstanî London de 27ê teşrîna peyêne de polîsan eşt dezgeh û keyeyanê kurdan ser. No kerdiş hema zî dewam keno û welatperwerê ke ameyê destbendkerdene xoverdayîşê kurdan û dostanê înan zî teber de dewam keno.

Serebûtêko bîn o balkêş zî hêrişê Heyet Tehrîr El Şamî (HTŞ) yê vera Helebî yê.

Her kes zaneno ke Îslamo sîyasî bernameyê Îngilîstanî de yo. Bingeyê Projeyê Kemberê Keskî ser o bi rengê 'Îslamê Sîyasîy' vera Sowyetan Afganîstan de, Komar û Tirkîya û Pakîstan de El Qaîde roîya, hetê îstîxbaratan ra ame weyekerdene. HTŞ zî Îdlîbê Sûrîye de hetê dewleta tirke ra ame rêxistinkerdene. Dewleta tirke nê cergî herêmanê îşxalkerdeyan ê sey Efrîn, Ezaz, Bab, Cerablûs, Serêkaniyê û Girê Spî de binê nameyê 'Artêşa Sûrîyeya Azade' de cakerdî û vera Îdareyê Xoserî yê Rojawanî amade kerd. 

Nê prosesî de ke dewleta tirke amadekarîya hêrişêkê hirayî yê vera Îdareyê Xoserî kerdêne 27ê teşrîna peyêne de HTŞyî hêrişê Helebî kerd, komanê OSOyî zî hêrişê xeta Şehba-Ti Tifetî kerd. Helebî ra dima HTŞyî verê xo da Hama û Humsî, cergabê OSOyî bi destûrê dewleta tirke hêrişê Şehba, Şêxmeqsûd, Eşrefîye û Minbicî kerd. Sûrîye û Rojawan seba kurdan xeta sûr a. Coka nê hêrişî normal nîyê. Armancê HTŞyî yo esas zî çinkerdişê Îdareyê Xoserî, çinkerdişê destkewteyanê kurdan o ke no plan hetê îqtîdarê AKP-MHPyî yê faşîstî ra ameyo kerdene.

Bêguman hem Îran, Rûsya hem zî Amerîka, Yewîya Ewropa û hemkarê înan do nê prosesî seba menfaetanê xo bişuxilnê û pozîsyonê xo dîyar bikerê hem zî komanê terorîstan seba armancanê xo biluxilnê. Senî ke şerê vera DAÎŞî faydeyê Rojawanî kerd û vurîya şorişêkê pîlî heman rewşe nika zî mumkîn a. Hetê bînî ra rewşe cidî û tehluyîn a. Eke xoverdayîşêko xurt nêro kerdene beno ke erjanê şorişî werte ra wedarîyê. Pawitişê Rojawanî pawitişê Kurdîstanî yo. Pawitişê Rojawanî pawitişê azadîy cinîyano. Pawitişê Rojawanî pawitişê merdimatîye yo! Sere de ciwanê kurdî ganî pêro şarê ma yê çar parçeyanê Kurdîstanî û şarê ma yê Ewropa biherikê waran, mîyanê xoverdayîşê Rojawanî de cabigêrê.

Kayo ke yeno kaykerdene normal nîyo. 9ê teşrîna verêne ya 1998î de Rayber Apo zemînê Sûrîye ra bi komployêkî ame vetene û ame waştene ke têgêrayîş û şarê kurdî bêrê tasfîyekerdene. Rayber Apo û şarê kurdî vera komployî Şorişê Rojawanî aferba, tarîx nuşt û cewabê Wisarê Şaran da. Nika zî yeno waştene ke şoriş û erjê şorişî, Sîstemê Îdareyê Xoserî bêrê tasfîyekerdene û qirkerdişê kurdan o nêmcetmende bêro temamkerdene. Vera ney ganî kurdî û dostê înan bi ruhê seferberîye tewrê prosesî bibê.