“Ma muhîmîyêka pîle danê wayeûbiratîya bi Kreûzbergî”

Hemşaredara Dêrike Rojîn Çeto vat ê muhîmîyêka pîle danê peymana şaredarîya wayeûbiratî yak e bi şaredarîya Frîedrîchshaîn-Kreûzbergî ya Berlînî reyde viraşta û vat, “Ma do tecrubeyanê xo yê modelê xorayraberdişî pare bikerê.”

Pirê dostanîye yê mabênê Dêrike ya Rojawanê Kurdistanî û şaredarîya Frîedrîchshaîn-Kreûzbergî ya Berlînî, ke no wextêko derg o dewam keno, hewteyê ravêrteyî de bi fermî. Proseso ke şaredarîya wayeûbiratîya mabênê di bajaran de rew ra dest pêkerdîbî, seba no proses temam bibo peymana wayeûbiratî meclîsê şaredarîyan de amî îmzakerdene. Peymane roja Sêşemeyî ya hewteyê ravêrteyî bi tewrbîyayîşê şaredaran amî îmzakerdene.

Yeno pawitene ke çarçewaya peymana şaredarîya wayeûbiratî de, ke Komeleya Bajarî ya Wayeûbiratî ya Frîedrîchshaîn-Kreûzbergî de hetê serekîya Elke-Dangeleteîtî ra amîya amadekerdene, Şaredarîya Frîedrîchshaîn-Kreûzbergî destek bido projeyanê sosyal, weşîye, perwerdeyî û ekonomî yê Dêrike. Şaredarîya Dêrike zî do hetkarîye bido prosesê entegrasyonî yê koçberanê Rojawan û Sûrîye yê ke Freuzberg de yê.

Derheqê pêkerdişê şaredarîya wayeûbiratîye de hemşaredaranê Dêrike Rojîn Çeto û Feremez Hemmo ANF’yî rê qisey kerd.

Çeto: Ma do Qalê Modelê Xorayraberdişî Bikerê

Çeto vat ê peymana wayeûbiratîye xelata kedkaranê şaredarîye, keyeyanê şehîdan û şarê Rojawanî kenê û vat ke ê muhîmîyêka pîle dane na peymane û ê do tîya ra tepîya pîya bixebetîyê.

Çeto vat 2012 de dimayê şorişê Rojawanî çarçewaya paradîgmaya neteweta demokratîke de Dêrik a Kantonê Cizîre de Kurd, Ereb û Suryanîyî pîya sîstemê xorayraberdişî ronayo û vat, “Embazan ê Almanan nê modelê ma yê rayraberdişî meraq kerdêne. Xusûsen wazenê bimûsê ke gama hetêk ra şerê 7 serran ê hemverê çeteyan estbi, senî bê mabên înan xizmetê şaredarîye domnayê. Naye ra sere de ma do tecrubeyanê xo yewbînan dir pare bikerê, xeylî çîyî estê ke eleqedarê şaredarîye yê ke ma yewbînan ra bimûsê. Dima ra zî ma do înan dir projeyanê hemparan virazê.”

Hemmo: No Serkewtiş bi Şehîdan Bi

Hemşaredar Feremez Hemmoyî zî vat verê 7 mengan heyetêkê Almanî serdana înan kerde û vat, “Embazan ê Almanan rastekênîya Rojawanî Dêrike ra dîye û ci ra mutesîr bîyî. Gama ke ameyî şaredarîya ma ser o çimdarîyî kerdî, bi nê hawayî xebatî hîna bîyî zêde. Hemmoyî ard ziwan ke şaredarîyêka Rojawanî reya ewilên a ke bi şaredarîyêka Ewropayije dir bena wayeûbira û ê do pîya projeyanê hemparan bica bîyarê.

Hemmoyî dewamê qiseykerdişê xo de vat, “Seba ma zaf muhîm o ke ma şarê Almanî dir, ke şarêko kan ê Ewropa yo, benê bira. No serkewtiş helbet bi keda şehîdanê ke 8 serrî hemverê çeteyanê barbarian de şer kerd bi. Bi xoverdayîşo ke bi serran ma ramot dinya de ma serberz gêrenê û şarê dinya wazenê ke ma nas bikerê û ma dir bibê waye û bira. Şaredarîya Kreûzbergî zî na çarçewaye de wazena şexsê şaredarîya ma de şarê ma dir bibo waye û bira.”

‘Ganî Dore de Şaredarîyê Bînî yê Kurdistanî Estbê’

Parlamenterê Partîya Çepgêre ya Eyaletê Berlînî Hakan Taşî zî seba peymana mabênê di bajaran de her di şaredarîyî pîroz kerdî û vat, “Ma vane ke no yê vernî yo û do dewamê ci zî bêro. Ma umîd kenê ke proses bi şaredarîyê bînî yê Kurdistanî dir zî dest pê bikero.”