‘Ma weçînayîşî rê amade yê, ma do reyêka bîne ser bikewê’

Endam û rayberê HDP’yî çend rojî verê cû seba weçînayîşê cayîyan ê Stenbolî ameyî têhet û da zanayene, ê weçînayîşê 23’yê Hezîrane yê Stenbolî rê amade yê û reyêka bîne do ser bikewê.

Bagcilaro ke hîrêyin ê qezaya tewr gird a Stenbolî yo, tede seba asayîşê sindoqan xeylî aktîvîteyî yenê viraştene. Partîya Şaran a Demokratîke (HDP) derheqê asayîşê sindoqan de heme qezayan de kombîyayîşî viraştî.  Endam û rayberê HDP’yî yê Bagcilarî derheqê asayîşê sindoqanê rayan û weçînayîşî de ajansê ma rê qisey kerd.

Bûrhan Tacaro ke nêzdîyê 20 serrî yo Bagcilar de yo, da zanayene ke weçînayîşê Yewşemeyî de Ekram Îmamoglû do bi rayêka berze reyêka bîne ser bikewo. Tacarî ard ziwan, her kes tewirê HDP’yî yê weçînayîşî dî û vat, “Ma hêzê HDP’yî verê cû zî mojna, ma do reyêka bîne bimojnê. Wa her kes naye wina bizano. Nê weçînayîşî de her kesî hêzê Kurdan dî.

Hêzê Kurdan ê Stenbol, Enqere, Îzmîr, Antalya, Adana û Mersînî ame famkerdene. Her kesî fam kerd. Dewlete zî fam kerd. Kes nêeşkeno nê welatî de Kurdan peygoş bikerê. Wa her kes naye wina bizano.  Weçînayoxan bi hawayêkê weşî no mojna. Girewtişê Selahattîn Demîrtaşî yê hepisxaneyî bihane yo. Teber de xeylî  Demîrtaşî estê.”

Ganî Ciwanî Sindoqan de Wezîfe Bigêrê Xo Ser

Mûstafa Ûgûrlûyî ard ziwan, heme endamê keyeyê ey verê sindoqan de wezîfedar ê û vat, “Ez HDP’yij a, sey weçînayîşê bînî nê weçînayîşî de zî ez do raya xo bida Ekrem Îmamoglûyî. Her kes baş zano ke weçînayîşo verên çinayî ra ame betalkerdene. Bîlasebeb betal kerd. Seba ke ser nêkewtî betal kerd. Bihaneyê ci yo xurt çin bi.”

Azad Avciyî zî ard ziwan, o do verê sindoqan de wezîfedar bibo û vengdayîş ciwanan rê kerd ke seba asayîşê sindoqan wezîfe bigêrê xo ser.

Mûzaffer Çîfçîyî zî vat,  “HDP ne mûhtacê Îmamoglûyî yo ne zî Yildirimî yo. HDP vera nê rejîmî tewrê weçînayîşî beno. Ma do reyêka bîne sîstemî bin bikerê.”