Ozan Canê ya ke keyeyê aye Koln de yo, seba ke weçînayîşanê 24'ê Hezîrane de paştdayîş bida HDP’yî şîbî Tirkîya. Wexto ke tewrê mîtîngê HDP’yî yê Edîrne bîye 23'ê Hezîrane 2018 de ameye destbendkerdene û seba ke fîlmê têkoşînê YPG/YPJ’yî yê vera DAÎŞ’î de kay kerdo ameyê sucdarkerdene.

Ozan Canê rê 6 serrî û 3 mengî ceza ameye birnayene. Kênaya aye Dîlan Orse seba serdayîşê dayîka xo menga Gulane de şîbî Tirkîya, la ameye destbendkerdene û bado ameye veradayene. Bado derheqê ci de qerarê ‘qedexeyê vejîyayîşê teberê welatî” ame dayene. Bi cehdkerdişê Parlamentera Partîya Çepe Gokay Akbûlûte rewşa hunermenda Kurdî û kênaya ci kewt rojdemê Meclîsê Federalî.

Şêwirmenda Wezaretê Karanê Teberî Mîchelle Munteferînge bi nameyê hukmatê Merkele cewab da persê parlamentera partîya çepe yê derheqê Ozan Canê û agêrayîşê kênaya yê Almanya. Goreyê cewabo ke resto ANF’yî Munteferînge da zanayene ke, konsolosxaneyê Almanan ê Estenbolî heta nika 7 reyî Ozan Canê hepisxane de zîyaret kerda.

Cewab de ame vatene, “Seba veradayîşê hemwelatija Almanya hukmatê federalî xeylî reyan pêvînayîşanê sîyasîyan de na babete arda rojdem. Waştişê hukmatê federalî semedê merdimîye ra veradayîşê hemwelatije yo. Labelê hetê Tirkî da zanayene ke mehkemeya înan xoser a û waştişê ma red kerd.”

Seba kênaya Ozan Canê Dîlan Orse zî şêwirmendî da zanayene, cehdkerdişê înan selahîyetdaranê Tirkî reyde dewam kenê ke qedexeyê vejîyayîşê teberê welatî bêro wedaritene.