Qezaya Bazîdî ya Agirî de vizêr Ahmet Bugrur (37) yo ke babîyê 3 qican o, saetanê serê sibayî de seba ke verê camî de malayî rayde pêrodayîş kerd ame destbendkerdene. Ame  îdîakerdene ke  Bugrurî Mudirîya Polîsan a Bazîdî de xo kişto.

Birayê Bugrurî, Resul Bugrurî vat: ''Vizêr serê sibayî polîsî gêrayî mi vat birayê mi nezarat de yo. Ez cade şîya qereqol la polîsan derheqê birayê mi de qet zanayîşêk mi nêda. Dima ra merdimê ma ûca ameyî pêser. Ma verê qereqolî de pawit. Nêm saete dima ambulans ame, dima wesayîtê cenaza ame. O wext înan vat, birayê mi pê xirqeyê xo, xo kişto. Ma dîmenê kamara waştî la înan vat polîsê nobetdarî o wext ûca nêbî. Ekîbê weşîye ra zî kesêkî vat heta ey ameyî birayê mi merdo.''

Cenazaya Buguruî verî ameye berdene Nêweşxaneyê Dewlete ya Bazîdî û dima ra ameye berdene Nêweşxaneyê Perwerde û Cigêrayîşî yê Agirî. Otopsîyê verênî de milê ey de morîye bibo zî, sebebê mergî bewlî nêbi. Ninûneyê ke cenazaya Bugrurî ra ameyî girewtene seba ke sebebê mergî bêro safîkerdene şawiyayî Serekîya Grûba Tibê Edlî ya Amedî.

Cenazaya Bugrurî bîn şewe Goristanê Koçkiranî ya Bazîdî de ameye definkerdene.  Hetê bînî ra keyeyê Bugrurî Serdozgerîya Komare ya Bazîdî de derheqê Mudurîya Polîsan a Bazîdî de pêhesnayîşê sûcî kerd.