Vizêr bi saeta herêmî 04.17 de merkezê ci Pazarcixê Mereşî de bi girdîya 7.8î erdlerz qewimîya û Dîlok, Meletî, Osmanîye, Amed, Riha, Adana, Semsûr, Hatay, Kilis û Rojawan û bajaranê Sûrîye de zî tesîrê xo yo giran mojna. Bîlançoya erdlerzî çend şino giranêr bena. Goreyê eşkerayîya peyên a AFADî 2 hezar û 921 kesan dinyaya xo bedilnaye û 15 hezar û 834 kesî birîndar ameyî xelisnayene.

Amed de 23 bînayî rijîyayî û bi desan kesan dinyaya xo bedilnaye û bi seyan kesî zî birîndar ameyî xelisnayene. La birîndaranê giranan ra zî tay dinyaya xo bedilnenê.

Platformê Paştîdayîş û Pawitişî yê Bajarî yê Amedî yo ke 82 rêxistinanê komelê sîvîlî ra yeno raameyene vizêr cade badê erdlerzî masaya krîzî nabî ro. Na masa hele bi hele averşîyayîşan teqîp kena. Endamanê platformî ra Samet Ucamanî  derheqê xebatanê înan de qisey kerd.

Ucamanî ard ziwan ke înan verî zirar û zîyan tespît kerdî û vat: ''Çîyê ke hewce kenê ma nê bewlî kerdî. Kamyew makîneyê karî, hacetî hewce kenê ma nînan ser vindetî. Bitaybetî mîmar û muhendîsê înşaat û jeolojî û embazê ma yê plankerdoxê bajarî xebatan rê çimdarîye kenê û na babete de zanayîş danê ma. Ma zî xebata temakerdişê kêmîyan rayra benê û dezgehanê komelê sîvîlî û dînamîkanê bînan ê bajarî de pêvînayîşan kenê. Rayna ma pîya bi masaya krîzî ya HDPyî zî gureyenê. Seba ke xebatê înan ê mehla û warî hina xurt ê masayê ma yê krîzî yewbînan weye kenê. Temasê ma bi walîtîye zî est o. Kêmayîye ke na babete de est ê ma kenê ke hal bikerê.''

Samet Ucamanî vat: ''Embazê ma zî hem waranê rijnayîşî hem zî herême de bînayanê xesarinan tesbît kenê. Xora nê cade nînê tespîtkerdene. Têna ma doneyanê peyênan pare kenê. Erdlerz hema beno û pîya bi nê erdlerzanê ke dima benê rijnayîşî benî. Ma veng danê hemwelatîyan ke heta ke eşkenê wa keyeyanê xesarinan mekewê. Ganî batanîye û xida biresê şarî. Hetkarîya  ke yena ma kenê ke biresnê herêman. Nika çîyê ke ma kenê wina yê. Ma hem warî de qeydan genê û hem zî qeydanê walîtîye û AFADî genê û kenê nînan perûne bikerê hewza hempare. Ma eşkenê vajê nika 82 dezgehê komelê sîvîlî mîyanê xebatanê teknîkîyan ê warî de yê.  Ma hetêkî ra zî perwerde danê embazanê ke wazenê xebatanê tespîtkerdişê xesarî de ca bîgêrê.''