Hemvervatoxê Meclîsê Ciwanan ê HDPyî Dêrsime Dag û Rohat Govercîn kombîyayîşê çapemenîye de qisey kerd û venga şarî da ke wa paştî bidê na kampanya.

‘Berbirsîyarê na felate îqtîdar o’

Rohat Govercînî ard ziwan ke îqtîdar nêeşkîyayo bibo cewabê nê prosesî û wina vat, ‘‘Gere şarê ma baş bizano ke nê merg û rijîyayîşî rîyê erdlerzî ra nîyo. Sebebê înan îqtîdar o ke tedbîrê xo nêgirewtî û hetkarîya şarê xo nêkerde. Ma baş zanê ke baro tewr giran yeno milê ciwananê şorişgeran ser o. Nê bingeyî ser o ma bi ruhê seferberîye roja yewine ra yo ke hewl danê ke şarê xo rê hetkarî bikerê. Ma bi koordînasyon herêman ra vila bîyî û şarê xo het de yê. Dewleta ke 3-4 rojî nêameye xirban ser o bi îlankerdişê halê îstîsnayî waşt nê cayan ra kontrolî xo dest de bitepîşa. 

Zincîra cuye

Govercînî dîyar kerd ke, sey Meclîsê Ciwanan ê HDPyî hemverê zincîra mergî yê îqtîdarî de ma zincîra cuye awan kerde û vat, ‘‘Kampanyaya ma do heme beşanê cuye bigîra mîyanê xo. Hedefê na kampanya yê bingeyînî nê yê; seba gedeyan waranê kayî viraştiş, hazirkerdiş û vilakerdişê werdan, pakîya derûverî, zîyaretê keyeyan û parekerdişê komunan ê. Ma venga şarê xo danê ke ma binê nê noqtayan de pîya bixebitîyê.

Bi paştîdayîşî ma cuya azade awan bikerê

Dêrsime Dag zî wina vat, ‘‘Hema zî îqtîdar nêeşkîyayo xo biresno heme xirban û hema zî binê xirban de şar paweyê xelisîyayîşî yo. Meclîsê Ciwanan ê HDPyî roja verêne ra yo ke bi ruhê seferberîye şarê xo het der o. Û bêtemulîya îqtîdarî reyna xo mojna ke hetkarîyan rê zî wazeno astengîyan bivejo. Ma dî ke dewlete çend bêçare ya. Hem bêçare ya hem zî nêeşkena probleman safî bikera. Coka unîversîteyî girewtî û nika her ca sey zîndanê akerde yo. Dewlete wazena bi nê zindanî ciwanan teslîmê polîtîkayanê xo bikera. Wazena kurdan koçê cayanê bînan bikera. Ma herra xo ca nêverdanê û nêşinê cayêkî.

Ma HDP ma dest bi xebatêka newa yê cuye kenê. Çarçewaya na kampanya de ma herêmanê erdlerzan de komîyayîşan bivirazê. Ma do cuyêka newa biafirnê. Ma venga heme ciwananê xo danê; bêrê ma zincîrêka newa yê cuye awan bikerê. Bêrê ma cuyêka newa, ciwane û azade awan bikerê û nîşanê heme dinya bidê.’’