Hemserekê pêroyî yê MEDYA-DERî Şêxmûs Karadagî derheqê erdlerzî de ANFyî rê qisey kerd.

Karadagî ard vîrardene ke xirbî hema erdî de yê û vat, ‘‘MEDYA-DERê Amedî ra ma 7 kesî vizêrî şan Amed ra ameyî Bazarcix û ma do hetkarîya şarê xo bikerê. Ma bajarî mîyan ra gêrayî û çîyo ke ma dî zerrîya ma hurdî-hurdî kerd. Xirbî hema erdî de yê û xebata AFADî çin a. Ma tena 2-3 kesî dîyî û ê zî bêçare ronişte bîyî. Ma şarê tîyayî ra musayî ke hema meytî binê xirban de yê. Gere bi lez û bez nê xirbî bêrê hewaneyene û hewceyîya şarî tîyayî bêra çareser kerdene. Çi heyf ne dewlete ne zî AFAD nê cayan de çin o’’

‘Ma do hetê şarê xo de vinderê’

Karadagî dîyar kerd ke do hetê şarê xo de vinderê û qiseykerdişê xo wina qedêna, ‘‘Şar wazeno ke cenazeyanê xo binê xirban ra bivejo la xebatêke zî tîya de çin a. Wina aseno ke do wina dewam bikero û beno ke aşmêke ra dima zî hema nê cenazeyî binê xirban de bimanê. Seba ney, ma ekîba MEBYA-DERî do tîya de hetê şarê xo vinderê û heta ke destê ma ra bêro, dewe û qezayan rê hetkarî biresnê. Ma şewa ke ameyî, beşdarê xebatanê vilakerdişê hetkarîyan bîyî û ma do herême de hetê şarê xo bimanê.’’