Meletî de dewa ToPraktepe ya qezaya Doganşehîrî û dewa Orenî ya qezaya Akçadag ke binê tesîrê erdlerzî de mendî, tede banêko pêt nêmendo.

Dewa Topraktepe de 350 û dewa Orenî de 850 keyeyî est ê. Wird dewê ke erdlerzî de bi temamî rijîyayî qet hetkarîya dewlete nêrasaya înan. Dewê ke problemê ci yê awe û ceyranî est ê de hema zî binê jirnayîşî de heywanê înan est ê. Dewijanê Topraktepeyî vat rixmo ke dewa înan nêzdîyê qezaya Doganşehîrî de ya, serekê şaredarîyê nêameyo qay înan a.

Dewijanê Topraktepeyî  ra Alî Baburî vat ê hîrê rojî dewe de vêşan têşan mendî û bi îmkananê xo xeymî nayî ro. Baburî vat: ''Badê hîrê rojan dewlete ameye tay xeymî eştê ûca û şîye. Medimê ma yê ke Îstanbul  û Îzmîr de yê înan ma rê hetkarî kerde. Ceyran badê 14 rojan ame û awe hema zî çîn a. Homayî rê şiker werdê ma est o la kincê ma çîn ê. Dewa ma de 11 kesan dinyaya xo bedilnaye. Dewe de 700 kesî bibî, nika 130 kesî mendî.''

Hasan Kayapinarî zî  vat: ''Semedê ma çîyo tewr muhîm cayêmenidşî yo. ma nêeşkenê xeyman de bimanê, zaf serd o. Ma veng danê selahîyetdaran la xora ê vengê ma nêeşnawene. AFAD hîrê rojî badê erdlerzî ame, seba ke ê kewtê erey kesê ke eşkayêne bêrê xelisnayene ê zî merdî.''

Mixtarê dewe Îrfan Barlasî seba ke dewe de xebatê xelisnayîşî nêameyî kerdene hêrsê xo ard ziwan û vat: ''Ma roja verêne pê îmkananê xo rayîrî akerdî. Erdlerzê diyînî de dewe serûbin bîye. Tay kesî vêşayîşî ra merdî. Seba ke çew nêame hetkarî nêkerd, kesê ke eşkayêne bêrê xelisnayene ê zî merdî. Êyê ke vêşayî ma esteyê înan arêdayî. Hetkarîya ka ma rê ameye zî ameye destsernayene.''

Dewa Orenî ra Mustafa Ozerî zî vat: ''Dewlete nê şarî ma rê hetkarî kerde. Ma nêeşkenê nê rijnayîşî wedarê, coka ma wazenê dewe ra vejîyê. Awe û ceyranê ma çîn ê. Tîya hinda cuye nêmende.''

Orenij Hasan Turkmenogluyî zî vat: ''Banê mi rijîya, ez mecbûr menda ameya keyeyê xesarinî yê keynaya xo. Mi hîrê erdlerzî dîyî la mi çîyo winayên nêdibî.''