Hetkarê Hemserekanê Pêroyîyan ê HDPyî Tayîp Temelî bi wesîleya Roja Rojnamegeranê ke Xebitîyenê eşkerayîyêke daye.

Temelî îfade kerd ke rojnamegerî na roje mîyanê şertanê giranan de pêşwazî kenê û vat: ''Bi qanûnê sansurî karê çapemenîya azade bîyî çetin. Rejîmê tekmerdimî bi destê dezgehanê sey Serekîya Têkilîyan a Serekkomarîye, Heyetê Çapemenîye yê Îlanî û RTUKî xîret keno ke kedkaran û dezgehanê çapemenîye bigêro binê kontrolê xo.

Goreyê doneyanê Komeleya Rojnamegeranê Dîcle-Firatî (DFG) 2022 de 39 rojnamegerî tepişîyayî, 76 rojnamegeran rê ceza dîyaye, 132 rojnamegerî wextê teqîbê xeberan de ameyî astengkerdene, 65 rojnamegerî raştê hêrişî ameyî, 1109 xeberî û tedeyîya 2210 parekerdişî ameyî astengkerdene. Mîyanê 6 mengan de 27 xebatkarê çapemenîya azadîye tepişîyayî. 10ê Çeleyî hînî bîyo roja xoverdayîşî ya rojnamegeran. Ma do tim rojnamegeran reyde bibê.''