Mîtîngê Îtîfaqê  Kede û Azadîye bi şîarê ''Ma şer, feqîrîye û zextan rê vajê hinda bes o, pîya bibedilnê'' Kartalê Îstanbulî de ame kerdene. Verê mîtîngî hemserek û hemvervatoxê partîyanê ke mîyanê îtîfaqî de yê sey kortejî ver bi cayê mîtîngî rayra şîyî. Dayîke Haştîye zî pa laçikanê xo yê sipîyan û tîlîlîyan sey kortejî kewtî kewtî Meydanê Kartalî

Vervatoxa TOPî Juliana Gozen vat: ''Ma tîya de yê. Yew hesabê ma est o ke do bêro girewtene. Ma qet cayêk nêşinî. Ma do nê îqtîdarî bişawê.''

Hemserekê EHPyî Hakan Ozturkî zî vat: ''Ma benê yew, benê hêzdar. Şaro ke  bibo yew qet yew hêzêk nêeşekno ey rono.  Şarê ma tîya de yo, nêtersa, bin nêkewt. AKP ma do ti bişawê.''

Serekê Pêroyî yê EMEPî Ercument Akdenîzî xespkerdişê şaredarîyan vist vîrî û vat: ''Heta ke Îtîfaqê Azadîye û Kede mebo, heta ke şima Amedî nêgirê cayê xo, şima nêeşkenê ablûqaya Îstanbulî wedarî. Berê ma bibê yew û pîya bibê azad.''

Hemsereka Pêroyî ya HDPyî Pervîne Buldan vat: ''Ma vera şer, zextan û feqîrîye tîya de yê. Eynî wextî de semedê vatişê 'jin, jiyan, azadî'  tîya de yê. Seba ke ma talanê vera xoza,cuye û huqûqî vajê bes o, ma tîya de yê. Seba ke ma îqtîdarê AKP-MHPyî yo ke Îstanbul kerdo merkezê tarîtîye, rê vajê nê, ma tîya de yê.  No hema destpêkerdiş o. Hîkayeya ma ya ke 7ê temmuze de ameye destpêkerdene do morê xo bido weçînitişî ro. Weçînitiş de eke Îstanbul de ser bikewê yeno no mana ke ma Tirkîya de ser kewtî. Îstanbul Amed o, Cizîra Botan, Serhat o. Îstanbul HDP yo. No meydan meydanê Mahîran, Kemalan, Îboyan, Mazlûman, Orhan Doganan, Berkîn Elvanan, Mûsa Anteran o. Ma nê meydanî ra startê weçînitişî danê. Hedefê ma oyo ke ma dahîna pîl bi.  Nê weçînitişî do peynîyê polîtîkayanê şerî û tecrîdî bîyarî. No weçînitiş do Pêkerdişê Îstanbulî peyser bîyaro. Ma do sey kurd, elewî, sunî, ermenî pêro pîya bigurîye û ser bikewê.''

Hemserekê Pêroyî yê HDPyî Mîthat Sancarî zî vat: ''Ma do vera şerî îtîfaqê tewr pîlî yê haştîye ronê. Her şer, operasyon nanê ma ra dizneno. Şarê feqîrî dahana keno feqîr.  Wazenê ameyoxê nê welatî xesp bikerê. Ma nê rê vanê nê.  Ma pêro pîya şerî rê vanê nê. Ma vanê ke ma semedê bedilnayîşî yenê. Pîya bi weçînitişî ma do heme waranê cuye de têkoşînî pîlêr bikerê. Ma do ser bikewê, ma do miheqeq ser bikewê.''