Eşkerayîya Fermandarîya Qerargehê Merkezî yê Pawitişê Şarî ya bi eleqedarîya serrgêra 37’ine ya Xoverdayîşê Rojeyê Mergî yê Pîlî yê 14’ê Temmuze wina ya:

 “Nê rojan de ke ma kewtê serrgêra 37’ine ya çalakîya Rojeyê Mergî yê Pîlî yê 14’ê Temmuze, ma kewtê fetlêka muhîme ya tarîxîye ya mucadeleyê ma. Hêzê kolonyalîstî yê qirkerdoxî hemverê mucadeleyê azadîya Kurdistanî de, ke bi serkêşîya Rayber Apoyî dest pêkerd, bi heme îmkananê neteweyî û mîyanneteweyîyan û hêrişanê hîrayan ê tasfîye û îmhayî nêeşkayî netîceyêk bigêrê. Mucadeleyê ma bi xoverdayîşêkê pîlî cewab dano heme hêrişanê dişmenî, çende şino hîna beno pîl. Herême de bîyo aktoro tewr xurt. Hêzanê kolonyalîst-hegemonîkan ke hemverê têgêrayîşê ma hêrişanê pîlan kenê, Başûrê Kurdistanî de awanîya xîyanetî şuxulnenê û hemverê qedemeyanê îdareyî yê têgêrayîşê ma pêlê hêrişê sîstematîkî û planî dayê destpêkerdene.

 Serê bingeyê planêkê winayênî de, hêrişan de verê nikayî endamo ercaye yê Komîteya Merkezî ya PKK’yî û mîlîtano serkêş, kedkaro pîl hemra Rûbar (Huseyîn Poyraz) û di hemrayê ke ê dir bî, reyna par Şengal de endamê Konseya RAyberdişî ya KCK’yî mîlîtano şorişgêr û serkêş hemra Zekî Şengalî û emser zî roja Newroze de, kedkarê pîlî yê partîya ma û endamê îdareyî hemra Sînan, Navdar û Serhat şehîd bîyê. Tewr peynî de destpêkê na menge de endamê Konseya Serekîya Pêroyî ya KCK‘yî û endamê Komîteya Merkezî ya PKK’yî şorişgêro rayber hemra Helmet (Dîyar Xerîb) û hemrayê ke ê dir bî Şahîn û Devran bi qeleşîye û bi tesinokîye bi damêka hêrişê heyayî şehîd bîyê.

 Ma sere de serkêşê ercayeyî yê çalakîya Rojeyê Mergî yê Pîlî yê 14’ê Temmuze û afernayoxê Roja Anorê Neteweyîyî M. Hayrî Dûrmûş, Kemal Pîr, Akîf Yilmaz û Alî Çîçekî û şexsê welaperwero pîl ê Kurdistanî hemra Helmetî de heme hemrayanê ke nê hêrişan de şehîd bîyê, înan hemine bi hurmetêkê pîlî bi vîr anê, ma heme sey hêzê gerîla sond wanenê ke vîrameyîşê înan rayraşîyayîşê Rayberîya Azade, Kurdistanê azadî bido ciwîyayene gonîya înan erd ro memano.

Bi ruhê xoverdayîşî yê 14’ê Temmuze ke îradeyê anor û serfirazîye yo, bi ruhê newekerdişê xoverdayîşî yê goreyê wextê neweyî, bi bawerî û qerardarîya ke hewn û xeyalanê heme şehîdanê ma bica bîyarê. Ma heme şarê xo yê welatperwerî rê silaman şirawenê. Nê dewrê muhîmî yê tarîxîyî de ma veng danê ciwananê Kurdistanî ke hîna zaf mesuldarîya xo ya tarîxîye rê wayîr vejîyê û bi hawayêkê aktîfî tewrÊ refanê mucadeleyî bibê.”