Serekwekîlê Gruba HDP'yî Saruhan Olûçî meclîs de derheqê rojdemî de kombîyayîşê çapemenîye viraşt.

Vera tecrîdî serkewtiş

Olûçî derheqê peyamê Rayberê Şarê Kurdî Abdullah Ocalanî yê seba grevê vêşanîye û rojeyê mergî de vat, “Mengêk verê cû rojeyê mergî amebi destpêkerdene, baş o ke hîna ke xesaro zêde nêqewemîyo, waştişê huqûqî yê çalakgeranê grevê vêşanîye ameyê bicaardene. Ma keyfweş ê ke waştişê çalakgeranê grevê vêşanîye ameyê bicaardene. Vizêrî dest bi tedawîyê çalakgeran ame kerdene. Tepişteyê ke grevê vêşanîye de bîyî, sewq bi nêweşxaneyan ameyî kerdene. Pawitişê ma o yo ke wextêko kilm de weşîya înan baş bena.”

Îşkenceyo ke Xelfetî de ameyo kerdene

Olûçî derheqê kesanê ke Xelfetî de îşkence bi înan ameyo kerdene de zî vat, “Xelfetî de îşkenceyo giran ameyo kerdene. No sûcêkê giranî yê merdimîye yo. Kesanê ke no sûc kerd ganî wezîfeyî ra bêrê girewtene. Ma Heyetê Pêroyî de vengdayîş bi dozgeran kerd la heta nika derheqê kesanê ke fermanê nê çîyî dayo de, tu cipersayîş nêameyo destpêkerdene.”

Olûçî qiseykerdişê xo de qalê Serekê Pêroyî yê CHP’yî Kemal Kiliçdarogluyî zî kerd û vat, “Rêzdar Kiliçdaroglûyî vatibi ke ganî seba musayîş û perwerdeyî yê bi Kurdkî parlemento de bêro muneqeşekerdene. Goreyê ma no vengdayîş muhîm o. Cayê çareserkerdişî meclîs o. Teyna seba ziwanê dayîke ney, ganî dewaya nasaneme û kulturî zî meclîsî de bêra çareserkerdene. Ma hêvîdarê bi tewrbîyayîşê partîyanê mûxalefetî û serdestdarîye no mesele do bêro çareserkerdene.”

Eleqeyê ci bi prosesê çarserkerdişî çin o

Olûçî dimayê eşkerayîye cewab da persanê rojnamegeran. Olûçî derheqê têkilîya qedênayîşê grevê vêşanîye û weçînayîşê Stenbolî de vat ke, “Hewteyêk o no pers ma ra yenê perskerdene. Ma eşkenê vajê ke tu eleqeyê ci bi prosesê çarserkerdişî çin o.

HDP zî bazarîyanê erjanan nêkeno û tu çîyêk cuya çalakgeran ra muhîmtir nîyo. Seba ma çîyo tewr muhîm o yo ke, hîna ke xesarêk nêresto weşîya çalakgeran, grev ameyo qedêneyene. Baş o ke nê wareyî de game ame eştene. Gamêka muhîma ke huqûq seba her kesî yeno bicaardene. Mûxatabanê ci zî no vat. Xora rêzdar Ocalanî zî bi rayîrê avûkatanê xo dabi zanayene ke no prosesê muzakereyî nîyo.”