Omer Ocalan: Eke berê Îmraliyî bêro girewtene do kaos pîl bibo!

Parlamenterê HDP’yî Omer Ocalanî vat, “Eke Birêz Ocalan bikewo dewre do huzur bêro. Eke vernîya berê Îmraliyî de bende estbo do kaos giran bibo.”

Pêvînayîşê ke verê weçînitişanê Stenbolî 2’ê Gulane de dest pêkerdî nizdê mengêk o destûr nêno dayene ke bêrê kerdene. Keyeyê Ocalanî ra parlamenterê HDP’yî yê Riha Omer Ocalan bi vîr vist ke pêvînayîşî dimayê xoverdayîşê grevê vêşanîye û rojeyê mergî ra virazîyayî.

 Ocalanî Ajansê Xeberan ê Mezopotamya rê qisey kerd û vat, “Netîceyê bedelanê ke seba Birêz Ocalan bieşko têkilî şarî dir rono ameyî dayene de nê pêvînayîşî ameyî kerdene.” Ocalanî bale ante serê cehdanê spekulasyonan ê dewlete ke dimayê pêvînayîşan dest pêkerdî û seba nê polîtîkayan vat ‘nizdbîyayîşê ercan ê.’

 ‘Ocalan Helm Dano Tirkîya û Rojakewtena Mîyanêne’

Omer Ocalanî ard ziwan ke Ocalan helm dano Tirkîya û Rojakewtena Mîyanêne, loma ganî têkilî ê dir bêro ronayene û vat, “18’ê Hezîrane ra nata berê Îmraliyî reyna ameyî panayene. Ganî vînayîşê Birêz Ocalanî biresê rayapêroyîye. Labelê AKP-MHP’yî dir fehmê gef û tasfîyekerdişê destkewteyanê Kurdan esto. Mucadeleyê şarê Kurdî heta dereceyêk no bin fîna. Birêz Ocalanî her reye vato, “Nêbeno ke şima mi ra vajê hewza venge de asnawberî bike.’ Seba ke welat helm bigêro ganî vernîya Birêz Ocalanî bêro akerdene.

Hîşyarîya ‘Kaos’î

Omer Ocalanî dewamê qiseykerdişê xo de vat, “Ocalan dereceyêka winayêne de yo ke eşkeno kaosê welatî biqedêno. Muzakerekaro sereke yê halkerdişê problemê Kurdan o. Ganî dewlete nê qebûl bikero. Bi pêvînayîşanê rîsipîyan û bi serkêşanê qorucîyan dir hal nêbeno. Ê tena eşkenê havile çareserîya Birêz Ocalanî rê bikerê. Çareserîye de muxatabî ê nêyê. Ganî dewlete rastîya rayberîye ya Birêz Ocalanî bivîno. Dewlete na yewe mabênê serranê 2013-2015’î de qebûl kerde. Aqlê dewlete yê a game û pratîkê dewlete yo nikayên ro yewbînan nênê. Polîtîkaya dewleta ya hemverîya Ocalanî û hemverîya Kurdan do faydeyêk nêdo nê welatî.

AKP na babete de mîyanê şaşîye de yo. Hetêk rat i do bi heme wasitayanê zextî yê dewlete hemverê nê şarî de tê bigêrê, ti do tecrîdî rayberê nê şarî ser o ferz bikerê û çend rojî verê 23’ê Hezîrane seba menfaatanê xo ê halî sey wasitayêk bişuxulnê. Dima ra zî ti do bêrê vajê ke wa şaro Kurd destek bido AKP’yî. Nê heme şaşî yê.

‘Têkilîya Hêrişanê Îşxalî Tecrîdî dir Esta’

Ocalanî peynî de vat, “Îşxalkarîya ke Başûrê Kurdistanî de esta û şero ke qewimîyeno têkilîya înan tecrîdê Îmraliyî dir esta. Dewleta vana qey bi polîtîkayanê şaşan do bieşko netîce bigêro. Do hîna zaf dej vejîyo werte û dişmenîya mabênê şaran hîna bibo xorî. Êyê ke vanê qey şaro Kurd do babeta heqanê xo de game peyde bierzo, sey verê nikayî nika zî xo xapênenê.”