Hetkarê hemserekê pêroyî yê Partîya Şaran a Demokratîke (HDP) Alîcan Onlu, derheqê kişîyayîşê Ayaz Guloglû yo 8 serrî û waya ci Nûpelda Guloglûya 4 serrî ke dewa Bîlgeç a qezaya Pulurî ya Dêrsimî de rîyê teqayîşê mayîne ra cuya xo vînî kerde eşkerayî daye. Onlu, kesê ke bîyê sebebê kiştişê domanan şermezar kerdî.

10 Hezar Mayînî Ameyî Ronayene

Onluyî vat ke Tirkîya peymana Ottowa serra 2003’î de îmza kerda û serra 2004 de bîya het û wina vat: “Goreyê na yewe ganî Tirkîya heta Adar a 2008’î heme mayînî pak bikerdêne. Ancî heta 2014 ganî mayînê ke ameyê ronayene wedartêne û hetkarî bidayêne qurbanan. La herêma Dêrsimî de 10 hezarî mayînê ronayeyî estê. Na yewe zî hemverê peymana Ottowa ya ke Tirkîya îmza kerda ya.”

‘Walî Wazeno Serê Sûcî Bigêro’

Onluyî, bale ante serê eşkerayîya walîyê Tûncelî û da zanayene ke walî bi eşkerayîya xo wazeno serê qewimîyayîşî bigêro û versûcan bipawo. Onluyî da zanayene ke goreyê Raporê Şopnayîşê Bombayanê Mîsket û Mayînan ê Teşebusê Tirkîyaya Bêmayîne, tena serra 2009 de 23 domanî rîyê mayînan cuya xo vînî kerde. Tirkîya de 40 serranê şerî de bi hezaran domanan cuya xo vînî kerde. Tewr peynî Ceylan Onkol, Enes Ata, Nîhat Kazanhan û bi seyan domanan bi şekanê giranan cuya xo vînî kerde. La hewna zî kerdoxan ra hesap nêame persayene. Seba ke şer biqedîyo ganî ma bi heme hêzê xo mucadele bikerê. La sazîyê fermîyî kenê ke serê naye bigêrê. Tewr peynî walîyê Tûncelî bi eşkerayîya xo kerd ke versûcî bêceza bimanê û rayîrê cezakerdişê versûcan girewt.”