Seba ke Tirkîya semedê operasyonê vera Rojawan,î destûr nêgirewt, inkey verê weçînitişî pêvînayîşê  Serekkomarê Tirkî Recep Tayyip Erdogan û Serekê Hukmatê Şamî Esadî rojdem de yo.  Wekîlê HDPyî yê Amedî û Hemvervatoxê Komîsyonê Karanê Teberî Hîyşar Ozsoyî babete ANFyî rê ercna.

Hîyar Ozsoyî vat: ''Tirkîya bitaybetî hîrê seranê peyênan de Rojhelatê Mîyanênî de bi hêzanê ke verî tengayî antî, kewt mîyanê prosesê normalî. Misir, Îsralil, Mîreyîyê Ereban ê Yewbîyayeyî û Erebîstanê Seûdî ( reyde averşîyayîşê giranî qewimîyayênî  û qismêkê înan ver bi normalbîyayîşî şinê. La hema zî tengayîyî est ê. Mabênê Tirkîya û nê welatan de problemê cîddî est ê ke pê yew di qalanê rindan û pêvînayîşan çareser nêbênê.

Tîya helqeya tewr muhîme xora Sûrîye ya. Waştişê pêvînîyaşê bi Esadî mojneno ke polîtîkaya Tirkîya ya vera Sûrîye îflas kerd. Erdogan wazeno verê weçînitişî pêvînayîş bikero la Şam nêwazeno. Xora Şam Tirkîya sey îşxalkere zî vîneno. Bitaybetî vatişanê Hulusi Akarî ra no yeno famkerdene: Esad û Rûsya rê 'şima destûr bidê, ma hêrişê kurdan bikerê, cayê ke destê înan de yê bîgêrê,  xora ma nê cayan reyna danê Esadî.'  Yanî vanê ke 'ma semedê yewîya Sûrîye tekoşîn kenê.' Eslê xo de  wazenê pîya bi Şamî  destkewteyanê kurdan biqedînê. Erdogan keno ke verê weçînitişî bi bedilnayîşê polîtîkaya Sûrîye hem meseleya kurdan û hem meseleya multecîyan serî ra komelî rê hîkayeyêke amede bikero. La meseleya nomalbîyayîşê bi Sûrîye çîyêko wina rehet nîyo. Coka goreyê mi na mesele hema bena derge.

Esad nêwezano verê weçînitişî pûan  û kredî bido Erdoganî. Çunke Esad des serrî yo vîneno ke Erdogan sekeno, pîya bi çeteyan Sûrîye de şer keno.  Amerîka û Îngîlîstanî zî eşker vat ke ê bi sponsorîya Rûsya yew normalbîyayîşê Erdogan û Sûrîye nêwazenê. Yanî na mesele de têna Erdogan nêeşkeno qerar bîgêro. Na rewşe do Tirkîya binena hetê Rûsyaya kaş bikero. Rojawan hema bi Esadî problemanê giranan ciwîyeno. Sey endamêka NATOyî Tirkîya heta ça eşkena bikero normal?

Amerîka  polîtîkya Sûrîye di hetan ra rayra bena. Rojhelatê Firatî de pîya bi Hêzanê Demokratîkî yê Sûrîye û kurdan gurîyena la dormeyê Îdlîbî de pîya bi Tirkîya. Eke Amerîka ra nêbo, Tirkîya eşkene ûcayan vera Rûsya, mîlîsanê Îranî û Sûrîye tepişo? Eke Erdogan û Esad bibê nizdî Amerîka do polîtîkaya xo ya Îdlîbî bibedilno.

 Xora meseleya tewr muhîme ya têhetameyîşê Esad û Tirkîya meseleya kurdan a.  Wird zî vera waştişê statuyê sîyasîyî yê sey xoserîye û federasyonî yê kurdan vejîyenê. Coka ê na babete de mutefîk ê. Tirkîya xeylêk wexto wazena destkewteyanê kurdan binate ra wedaro. Semedê  nê çîyo ke destê ci ra yeno kena, paştî dana çeteyan.  La hinda ameya peynîya nê sîyasetî. Eke wazena zirarê girdî bido kurdan û verê statuyê ci bîgêro têna yew rayîrê nê est o, o zî Esatî reyde roniştiş û pêkerdiş o. Tirkîya semedê bêstatuverdayîşê kurdan beno ke heme mutefîkanê xo biroşo û pîya bi Esadî têbigêro. Eke Tirkîya dişmenîya vera kurdan caverdo eşkena Rojhelatê Mîyanênî de pozîsyon bigêro. La seba ke kurd/e dayîka xo mevîno ê şinê verê linganê Esadî ke tira vatêne qetilkarê 500 hezaran kesan.''