Almanya de reya ewilêne hende eroîn yeno dîyene. Herêma Frankfûrt Oderî ya serê sînorê Almanya-Polonya de, yewîyanê polîsanê gumrukî yê Almanan kamyonêk bi plakaya Gurcistanî sehnaye û tede 670 kîlo eroîn dî ke yeno texmînkerdene vaya ci 50 mîlyon Euro ya.

Hêzanê polîsanê gumrukî pêhesna ke eroîn mîyanê paketanê loquman ê ke Tirkîya ra ameyê de ameyo nimnayene û resimanê rontgenî de bi şans ameyo dîyene. Yewîyanê asayîşî yê Almanan dima ra dest bi cigêrayîşî kerd û vet werte ke eroîn ê şebekeyêkê narkotîkî yê Tirk-Hollanda yo.

Eşkera bi ke eroîno ke kamyone de ameyo dîyene mîyanê 532 paketanê qijkekan ê loquman de ameyo nimitene. Şoforê kamyone ame destbendkerdene. Ameyêne plankerdene ke eroîno Afganîstan ra ardibi berê Belçîka û ûca ra welatanê cîyayan ê Ewropa de biroşê. Yewîyanê polîsanê Almanan serra 2014 de eyaletê NRW’yî de 330 kîlo eroîn dîbi.