Konseya Kurdan a Demokratîke ya Fransa (CDK-F) seba ke Qirkerdişê Parisî yê 9ê Çeleyê 2013î ser ra 'sirê dewlete' wurzo, vizêr salona Victor Hugoyî ya Parlamentoyê Fransa de konferansêk kerd.Xeylêk huqûqnas, sîyasetmedar û temsîlkarê dezgehan tewrê konferansî bîyî.

Destpêkê konferansî de Hemkoordînatorê Neteweyî yê Partîya Çepgîre Jean Christophe Sellinî qisey kerd û ard ziwan ke kurdî bi bedelan têkoşînê azadîye kenê û ê wazenê ke dewleta Fransa wa sirê dewlete wedarna.  

Birayê Sakîne Cansiz Metîn Cansizî vat: ''Ma edaletêkê raştikênî wazenê. Se serrî şêrî zî ma do têkoşînê edaletî rê dewam bikerê.''

Dima bi moderatorîya Hetkarê Serekê Baroyê Parisî Vincent Niore roniştişo yewin dest pêkerd. Avûkat Antonie Comte qisey kerd û vat: ''Ganî Fransa kurdan bipawa û kiştoxanê kurdan muhakeme bikera. Verê dosyaya cigêrayîşî de astengîya tewr pîle zî ajanê tirkî yê.''

Rojnameger Laure Marchando ke Qirkerdişê Parisî yê 2013î ser o belgefîlmêk viraşto û kitabêk nuşto pare kerd ke Ewropa de xîretê sîyasetmedaranê kurdan yenê wedaritene.

Roniştişo diyîn ê konferansî hetê Hetkarê Serekê Koma Les Écologîstes Jerôme Gleizesî ra ame îdarekerdene. 

Wekîla Têgêrayîşê Serewedaritoxan Danielle Simonnet îfade kerd ke PKK vera terorî şer keno û qiseykerdişê xo bi sloganê 'jin, jiyan, azadî' qedîna.

Senatorê Partîya Kumunîste Laurence Cohen vat: ''Polîtîkayê vera kurdan nênê qebulkerdene. Cinîyê kurdî cinîyan ê bînan rê benê îlham û hêvî.''

Dima Hemsereka Fransa-Kurdistanî Sylvie Jan qisey kerd û vat: ''Seba ke PKK lîsteya terorî ra bêro vetene xebatê pîlî ganî bêrê kerdene. Ganî bêro famkerdene û hîskerdene ke PKK terorîst bîyo. Têgêrayîşêkê xoverdayîşî yo.''

Endama Merkezê Jineolojî Sarahe Marcha vat: ''Azadîya cinîyan prensîbo verên ê PKKyî yo. Têgêrayîşê azadîya Kurdîstanî sey azadîya cinîyan yeno dîyene. Ganî merdim bivîno û bizano ke PKK çira yeno hedefkerdene. Seba ke Sakîne, Fîdane û Leyla cinîyê şorişgêrî bîyî ameyî hedefkerdene.''

Sereka SOSî Racisme Dominique Sopa vat: ''Qirkerdişê 23yê Kanûne ra dima şermêka pîle virazîyaya. Sakîne, Leyla Fîdane teyna şima nîyê, ma yê zî. Ma heman keyeyî ra yê. Eke ma bieşkê na hişmendî û hîsî bidê komelî ma do bizêdîyê.''

Cigîra Sereka Yewîya Heqanê Merdiman Marie-Christine Vergiat vat: ''Ma hêrsbîyaye yê. Ma hêvî kenê ke Tirkîya rê teda bêra kerdene. Ma têkoşînê cinîyan ê kurdan girîng vînenê. Ez dewleta Fransa şermezar kena ke edalet nêardo ca.''

Dima Wekîlan Frédéric Mathieu û Berîvan Firat qisey kerd. Peynîya konferansî de ame waştene ke wa cade sirê dewlete bêro wedaritene, dewleta Fransa agahîyanê serê Qirkerdişê Parisî eşkera bikera û PKK lîsteya terorî ra wa bêro vetene.