Binpankerdişê Rayberîya Herêma Kurdistanî û hêrişê îşxalkerdişî yê dewleta Tirkî yê vera Başûrê Kurdistanî Parlementoyê Swêdî de bi panelêk ameyî munaqeşekerdene.

Parlementera Partîya Çepe Amîneh Kakabavehe, parlementerê Partîya Karkeranê Sosyal Demokratan Anders Osterberg, parlementera Partîya Lîberale Marîa Nîllsone, Başûrê Kurdistanî ra rojnameger Şerwan Şerwanî, Başûrê Kurdistanî ra çalakgere Tara Huseyîne panel de qisey kerd.

Kakabavehe: Tirkîya kişena, kes qalê ci nêkeno!

Kakabavehe ard ziwan ke Kurdî teyna hemberê çeteyanê DAÎŞ’î de ney, hemberê zext û hêrişanê Tirkîya, Sûrîye û Îranî zî xo ver ro danê û bale ante serê hêrişanê dewleta Tirkî yê Başûrê Kurdistanî. Kakabavehe vat ke, “Bi seyan dewî ameyî çinkerdene, bi hezaran sîvîlan erdê xo ra koç kerd. Tirkîya bombardûman kena, kişena û merdimî welatê xo de sey bextwaştoxan ciwîyenê. La tu kes qalê nê çîyan nêkeno.”

Şerwanî: Şarê Başûrê Kurdistanî binê zextî de yo

Rojnameger Şerwan Şerwanî zî ard ziwan ke şarê Başûrê Kurdistanî binê zext û hêrişanê Iraq, Tirkîya û Rayberîya Herêma Kurdistanî de yo û no semed ra erdanê xo ra koç kenê. Şerwanî bale ante ser ke, Başûrê Kurdistanî rojnameger, çalakger û avûkatê heqanê merdiman binê zextan de yê û yenê girewtene û qetilkerdene.

Huseyîne: Îxlalê ke Başûrê Kurdistanî de qewemîyenê yenê nimitene

Çalakgere Tara Huseyîne zî ard ziwan ke îxlalê ke Başûrê Kurdistanî qewemîyenê medyaya dinya ra yenê nimite. Huseyîne vat, “Dewleta Tirkî paştdayîş da çeteyanê DAÎŞ’î. Wexto ke ma tîya de qisey kenê, Tirkîya bombardûmanê xo dewam kena. Tewr kêmî 45 sîvîlî nê hêrişan de merdî. Tarîx û xozayî yenê talankerdene. Dinya hemberê na îşxalkarîye de bêveng a. Ganî Swêd hemberê nê hêrişan de tewirê xo eşkera bikero.”

Huseyîne vat, “Dewleta Tirkî dana zanaeyene ke a cayanê PKK’yî bombardûman kena, la PKK ê cayan de çin o. Şarê seba ke cuya xo xelisnayo, fek erd û wareyanê xo verdayo. Labelê beno ke çeteyê DAÎŞ’î bikewê ê cayan.”

Partîya Lîberale: Tirkîya seba qirkerdişê Kurdan her çîyî kena

Parlementera Partiîya Lîberale Marîa Nîlssone ard ziwan ke partîya înan paştdayîş dana Rayberîya Herêma Kurdistanî û ê zext û binpankerdişanê vera heqanê merdiman qebûl nêkenê

Nîlssone vat, “Tirkîya seba çinkerdişê Kurdan her çîyî kena û vervatoxê înan ê Polîtîkaya Teberî Fredrîk Malm do na babete bibêro rojdemê parlementoyî.”

Parlementera Partîya Karkeranê Sosyal Demokratan Anders Osterberge da zanayene ke înan xeylî reyî hêriş û zextê dewleta Tirkî rexne kerdê û îşxalkerdişê Efrînî kerdo rojdemê Neteweyanê Yewbîyayîyan.