Vervatoxa HDPyî Ebru Gunay, Hemsereka Pêroyî ya DBPyî Salîha Aydenîz, Hemserekê KCDyî Berdan Ozturk û temsîlkaranê dezgehanê demokratîkan bînaya DBPyî ya Amedî de kombîyayîşê çapemenîye kerd û kombîyayîş de bernameyê çalakîyan ê vera tecrîdê Îmraliyî ame parekerdene.

Îdarekara TUAD-FEDî Safîye Akdag kombîyayîş de qisey kerd û vat: ''Seba çareserîye ma ver bi Îmraliyî şinê. Şarê kurdî, şarê Tirkîya û Rojhelatê Mîyanênî Birêz Ocalanî sey îradeyê çareserîye vînenê. Coka ganî avûkatê ci Ocalanî bivînê. Heta ke tecrîd dewam bikero krîzê Tirkîya zî do nêqedê. Tecrîdê Îmraliyî hînî vurîyayo stratejîya îdarekerdişî ya îqtîdarê AKP-MHPyî. Ma venga îqtîdarî danê ke nê kayî ra fek vera bido.

Bi mîlyonan kesî wazenê ke wa sîyasetê tecrîdî biqedo, avûkatî şorê Îmraliyî. Çarçewa nê waştişî de ma bi şîarê 'Seba çareserîye ma ver bi Îmraliyî şinê' bire daye ke ver bi Gemlîkî şorê. 6ê sibate de, ma do Qoser û Geverî ra di baskan ra dest pê rayraşîyayîşî bikerê û 15ê sibate de Gemlîk de rayraşîyayîşê xo biqedînê. No rayraşîyayîş vera tecrîd û çaresernêkerdişî cigêrayîşê edaletî yo û heta ke avûkatî şorê Îmraliyî ma do çalakîyanê xo rê bêmabên dewam bikerê.''

Eşkerayîye de venga şar, hêzanê demokratîkan û pêro kesan ame dayene ke wa tewrê rayraşîyayîşî bibê.