Parlamenterê HDP'yî yê Edeneyî Kemal Pekozî derheqê qedênayîşê grevê vêşanîye û prosesî de ajansê ma rê qisey kerd. Pekozî ard vîrî, seba wedaritişê tecrîdî 8 kesan canê xo feda kerd û bale ante serê heqdarîya xoverdayîşê grevê vêşanîye.

Pekozî ard ziwan, rîyê bêxemîya hukmatî ra 8 kesan cuya xo vîndî kerde û vat, “Bi vatiş û polîtîkayanê şerî ney, bi sîyasetî, bi qiseykerdişî şaran rê huzur do bêro. Ma verê cû zî dî; bi pêvînayîşan huzurî eşkenê bîyarê welat. Gamê ke nê demanê peyênan de wareyê eskerîye de yenê eştene welatî do bifînê mîyanê rewşa xirabêre. Ma hêvî kenê ke rew nê polîtîkayan ra agêrenê.”

Eke gamê seba weyekerdişê şerî bêrê eştene nêtîce do xeylî giran bibo

Pekozî bale ante serê qedênayîşê grevê vêşanîye û vat, “Xeylî muhîm o ke Ocalanî reyde pêvînayîşî bê astegkerdiş bêrê kerdene û perspektîfê ke Ocalan dano bêrê girewtene.” Pekozî da zanayene, pêvînayîşî bi nê hawayî teyna seba şarê Kurdî ney, seba Tirkîya û Rojakewtena Mîyanêne zî xeylî muhîm ê û vat, “Her peyamê Birêz Ocalanî seba Tirkîya muhîm o û karê ci zî tede esto. Rayîrê cuyêka têduşte ya şaran û huzur Îmraliyî ra derbaz beno.”

Ganî kesê muhîmî yê cimatî zî şorê serdana Ocalanî

Pekozî derheqê muhîmîya pêvînayîşî de vat, “Bêguman xeylî muhîm o ke Birêz Ocalan bieşko avûkat û keyeyê xo bivîno. Teyna avûkat û keyeyî ney, kesê ke cimat ci ra hes keno û hurmet mojneno ci zî bieşkê şorê serdana Ocalanî. Çîyêko winayên seba menfaatê şaran û Tirkîya rayîrê gamanê muhîman do a bikero.”