Wekîlê HDPyî vera tecrîdkerdişê Rayberê Şarê Kurdî Abdullah Ocalanî verê Wezîrîya Edaletî de 22 rojî yo Nobeta Edaletî kenê.

Wekîlê HDPyî yê Adana Kemal Pekozî derheqê nobete de ANFyî rê qisey kerd. Pekozî vist vîrî ke 2015 ra nata tecrîd yeno girankerdene û vat: ''Seba ke Birêz Ocalanî de pêvînayîşî nênê kerdene, tira xeberêke zî nêna girewtene. Na rewşe zî bena sebebê qesawetî. CPT zî derheqê zîyaretê xo yê Îmraliyî de eşkerayîyêke nêdano. CPT vano seba ney destûrê dewleta tirke lazim o. La no raşt nîyo. Birêz Ocalanî rê tim cezaya dîsîplînî dîyena û pê bahaneyanê sey 'keştîye xeripîyaye ya, hewa xirab o' pêvînayîşî yenê astengkerdene.''

Pekozî îfade kerd ke bi seyan avûkatan û dezgehanê huqûqî seba pêvînayîşê Îmraliyî muracat kerdo la cewab nêdîyayo înan coka înan dest pê Nobeta Edaletî kerdo. Pekozî vat: ''Ma waşt ke vengê xo bidê eşnawitene. Ma verî verê Wezîrîya Edaletî de eşkrayîye dayêne la astengîyan ra vizêrî ra nata ma verê Meclîsî de eşkerayîya xo danê. Tecrîd her kesî eleqedar keno. Seba ke na tedaya vera Birêz Ocalanî biqeda, heqê merdiman bêrê caardene ma na çalakîye kenê. Çalakîya nobete heta ke tecrîd biqedo do dewam bikera û eke no metod qîm nêkero ma do çalakîyanê cîyayan bikerê. Ganî tecrîd qetî biqedo.''