Komîteya Rayberdişî ya PKKyî derheqê erdlerzî de eşkerayîye daye û nê pare kerdî:

''Ma sey Têgêrayîşê Azadîye yê Kurdîstanî û şarê kurdî gama ke serrgêra Komployê 15ê Sibate yo ke 'Roja qirkerdişê kurdan o' ciwîyayenê, felaketa gird a diyîne ameye.  6ê Sibate de Kurdîstan, Tirkîya û Sûrîye de erdlerzo gird qewimîya. No erdlerzo ke çew eşkeno vajo, facîaya sessere ya, de bi desan bajaran de bi des hezaran kesan dinyaya xo bedilnaye, bi se hezaran kesî birîndar bîyî û bi mîlyonan kesî binê tesîrê erdlerzî de mendî. Beno ke rîyê şertanê zehmetan ê zimistanî ra netîceyê felakete girdêr ê.

Dejê ma gird o. Ma dejê heme kesanê ke binê tesîrê erdlerzî de mendî, pare kenê. Homa rehmê xo pê kesanê ke dinyaya xo bedilnaye, bikero û şîfa bido birîndaran. Ma heme keyeyanê ke merdimê înan merdî û şarê xo, şaranê Tirkîya û Sûrîye rê serweşîye wazenê. Heme kesê ke cade vazdayê gazîya mexdûranê erdlerzî ke birînanê înan bipêşê, ma înan rê zerrîya safî ra spas kenê.

Bêşik erdlerz afata xozayîye ya û merdimayîye zana ke kamyew ca herêma erdlerzî ya.  Seba ke tedbîrê erdlerzî nêameyî girewtene, felakete wina girde bîye. Bi serran o semedê erdlerzî şarî ra bi des mîlyonan dolarî ameyî arêdayene. Nika yeno vînayene ke  îqtîdarî no pere paştgêranê xo rê xerc kerdo. Erdlerz nêmirneno, bêîhmalkarîye mirnena. Dewlete û îqtîdaro ke pê xîle û zûranê xo şarî xapîneno, mirneno.

Nê erdlerzî heme maskeyê îqtîdarî dayî war. Îqtîdarî badê erdlerzî xebatê hetkarî û xelisnayîşî qîmkerde reyra nêberdî û komel têna verda.  Hem verê erdlerzî tedbîrê ke hewcê kenê nêgirewtî û hem zî badê erdlerzî hetkarîya ke hewca kena nêkerde. Coka sebebê nê xesarê girdî û mergan îqtîdarê AKP-MHPyî yo.

Şarê ma heta nika bi paştîdayîşî keno ke dejê mexdûranê erdlerzî şenik bikero. Badê şokê verênî bi ruhê seferberîye hetkarî ameye kerdene. Şarî ganî çirey cuye û qederê xo teslîmê dewlete mekerê. Dimayê felakete herinda gazîkerdişê dewlete de  ganî verî merdim qederê xo bîgêro destê xo. Ganî hinî şarî rîyê raştî yê îqtîdarî bivînê û qederê xo bîgêrê destê xo.

Îqtîdarê AKP-MHPyî reyna serê sûcî de tepişîya. Îqtîdarê faşîstî erdlerzî zî goreyê menfeatê xo şuxulna, pê îlankerdişê Halê îstîsna keno ke emrê xo bikero derg. Şarê Tirkîya do hesabê kerdişanê ci, îqtîdarî bipersê. Sere de kurdî do heme şarê Tirkîya nê îqtîdarê faşîstî mîyanê nê dejî de bifatisnê. Şarî do destûr medê ke vîjnayîş bêro peydeeştene û peynîya nê faşîzmî bîyarê.

Têna prosesê wedartişê xirban de nê, ganî semedê kêmkerdişê xesarê erdlerzî zî şarê ma bi ruhê seferberîye paştî bido. Seba ke erdlerz zaf giran bi û şertê zimistanî zehmet ê, piştişê birînan, şenikkerdişê dejan do wextêko derg dewam bikero. Ganî şarê ma piranê xo, keye û çî-mîyê xo mexdûranê erdlerzî reyde pare bikero. Ma pê bawer ê ke şar ma tim wina hetkarî bikero.''