Ronayoxanê PKKyî ra Sakîne Cansiz, Temsîlkara KNKyî ya Parisî Fîdane Dogan û Endamê Têgêrayîşê Ciwanan Leyla Şaylemez 9ê çeleyê 2013î de Buroyê Enformasyonî yê Kurdîstanî de, paytextê Fransa Paris de ameybî qetilkerdene. 23yê kanûna 2022yî de zî Merkezê Kulturê Kurdan ê Ahmet Kayayî de Endama Konseya Rayberdişî ya KCKyî Emîne Kara (Evîne Goyî), hunermend Mîr Perwer û welatperwer Abdurrahman Kizil ameyî qetilkerdene.

 Wekîla HDPyî ya Amedî Remzîye Tosun derheqê Sakîne Cansiz û têkoşînê ey de ajansê ma rê qisey kerd.

Tosune têkoşînê Cansize yo 45 serre vist vîrî û ard ziwan ke Sakîne Cansiz neferêke bîye ke felsefeya Rayberê Şarê Kurdî abdullah Ocalanî pêro dinya rê daya şinasnayene. Tosune vat: ''Aye emrê xo da têkoşînê kurdan û cinîyan. Seba rêxistinkerdişê cinîyan ê kurdan keda ci pîl a. Sakîne Cansiz ra dima Kobanê de vera DAÎŞî serkewtiş ame destvistene. Cinîyan ê kurdan Kobanê de bi felsefeya Ocalanî û bi pratîkê Sakîne Cansiz serkewtişêko pîl vist dest. Ewro zî Îran û Rojhelatê Kurdîstanî de cinîyî bi şîarê 'jin, jiyan, azadî' na felsefe vila kenê.''

Tosune bale ante ser ke Qirkerdişê Parisî yê 9ê Çeleyê 2013î ra dima reyna heman şaristanî de 3 kurdî ameyê qetilkerdene û vat: ''Ganî nê qirkerdişî sey xîretê astengkerdişê felsefeya Birêz Ocalanî bêrê ercnayene. Xora 50 serrî yo vera felsefeya Birêz Ocalanî hêrişî est ê. Oyo ke hêrişê ci ame kerdene û ame qetilkerdene rayraşîyayîşê pratîkî yê felsefeya Birêz Ocalanî bi. Hêriş vera îdeolojîya azadîya cinîyan bi. Ma hêvî kenê ke 2023 do biba serra azadbîyayîşê Birêz Ocalanî.''