Paytextê Fransa Paris de 22ê kanûna 2022yî de vera Merkezê Kulturê Kurdan ê Ahmet Kayayî hêrişo çekdar ame kerdene û Emîne Kara, Mîr Perwer û Abdurrahman Kizil şehîd bîyî. Qiştox William Malet ame tepiştene û selahîyedaran no hêriş sey ''hêrişê nîjadperestî'' hesibna ke Konseya Kurdan ê Demokratîkan a Fransa (CDK-F) nê red kena.

CDK-F  vano no ''hêrişêko sîyasî'' yo û ganî hetê serdozgerîya antî-terorî ra bero cipersayene. Derheqê cipersayîşî de vervatoxanê CDK-E Bêrîvane Firat û Agît Poltî û avûkatan Christian Charrière-Bournazel, David Andic û Jean-Louis Malterre  Merkezê Kulturê Kurdan ê Ahmet Kayayî de kombîyayîşê çapemenîye kerd.

Avûkatan bale ante ser ke cipersayîş bi hewayêkê giranî yeno rayraberdene, persî nînê cewabkerdene û qesawetê xo ardî ziwan. Avûkatan vist vîrî ke dewayê vera ciwananê kurdan hetê masaya antî-terorî yenê rayraberdene la dewaya qirkerdişî de dozgerîya antî-teoroî dewre nêkewte û waşt wa dewa sey dewayêka sîyasîyî bêro destgirewtene.

Agît Polatî zî vat: ''Kiştoxî pêvînayîşê xo yê psîkîatrî de bi xo vato o kurdan û PKKyî ra hes nêkeno. Çunke PKK hêrişê Tirkîya keno. Tîya eşkera çîyo sîyasîyî est o. Reyna kiştox William Maletî gama ke nezaret de bi vat ey Merkezê Kulturê Kurdan ê Ahmet Kayayî hedef girewto. Kam wezîfeyê hêrişî dayo William Malet?''