Komîteya Vergirwetişê Îşeknceyî ya Ewropa  (CPT) raporê xo yê pêroyî yê 32. yê 2022yî eşkera kerd. CPTyî rapor de vat înan Zîdanê Îmraliyî zîyaret kerdo la derheqê rewşa Rayberê Şarê Kurdî Abdullah Ocalan, Omer Hayrî Konar, Veysî Aktaş û Hamîlî Yildirimî de zanayîş nêda.

 CPTyî vat înan 2022yî de Zîndanê Îmraliyî zîyaret kerdo la derheqê tecrîdê giranî yê dewleta tirke de,yo ke Îmrali de yeno rayraberdene, zanayîş nêdayo.

 Rapor de derheqê zîyaretî de nê ameyî parekerdene: ''Aşma êlule de ma semedê  tepişteyanê koçberan ê xerîban Tirkîya zîyaret kerde. Bi wesîleya zîyaretî heyet seba ke derheqê rewşa çar tepişteyanê Îmraliyî de zanayîş bigêro şi Îmrali. Bitaybetî serê falîyetanê komelkî yê tepişteyan û temasê înan ê bi dinyaya teberî ser o ame vindene.''