Raporê otopsî yê tepişte Îrfan Kiliçî: Xokiştiş nê înfaz o

Tepişteyo Kurd Îrfan Kiliço ke selahîyetdaranê dewlete îdîa kerdibi Zîndanê Kandira yê Tîpê F’yî yê Hûmara 2’yine de ‘xo kişto’ raporanê vernîyan ê otopsîye de vejîya werte ke “bi birîndarbîyayîşî” cuya xo kerda vînî. 

Raporo vernî yê otopsîye yê Îrfan Kiliçî yê 32 serrî ke amebi îdîakerdene Kocaelî de Zîndanê Kandira yê Tîpê F’yî yê Hûmara 2’yine de, roja 3’ê Temmuze xo kişto vejîya. Goreyê raporê vernîyî yê Sazîya Tibê Edlî ya Kocaelî ame vatene ke Îrfanî bi birîndarbîyayîşî cuya xo vînî kerda. Rapor de persa ‘merg netîceyê birîndarbîyayîşî de bi’ rê cewabê ‘e’ ame dayene.

Se Bibi?

Amebi îdîakerdene ke tepişte Îrfan Kiliçî yo ke Kocaelî de Zîndanê Kandira yê Tîpê F’yî yê Hûmara 2’yine de bi, roja 3’ê Temmuze koxuşa xo de xo kişto, cenazeya Îrfanî amîbî berdene bi qezaya Bongilanî ya Çewlîgî û ûca amîbî wedartene.

Detayanê ewilênan ê derheqê mergê Îrfanî de amebi vatene ke roja 3’ê Temmuze serê sibayî dorê saete 09.00 de gama ke embazê êyê oda seba sporî vejîyayê teber xo kişto. Heman wextî de amebi îdîakerdene ke Îrfanî Kiliçî notêk sey “Ez dewleta Tirkî ya îşxalkare û xîyanetê PDK’yî protesto kena. Mertalanê ganeyanê ke Başûr de yê înan rê silam bo. Şima tena nêyê, vengêk zî Çewlîg ra. Ez tecrîdê serê Rayberîye şermezar kena’ verdayo.

Keyeyê Kiliçî: Xokiştiş Nê, bi Îşkenceyî Ameyo Kiştene

Hemverê nê de keyeyê ci yo ke cenazeya Îrfan Kiliçî girewte meyîtê ê sehna û vat ke sere û destanê Kiliçî de şikitişî estê, qeleşêk sereyê ê de virazîyayo. Keyeyo ke îdîayanê xokiştişî yê derheqê Îrfan Kiliçî qebûl nêkeno vano ke Kiliç bi îşkenceyî ameyo kiştene. Raporê otopsî, vatişanê keyeyî rast ramojneno.