Rayberê Şarê Kurdî Abdullah Ocalan û Omer Hayrî Konar, Veysî Aktaş û Hamîlî Yildirim ê ke zîndanê Îmraliyî de binê tecrîdî yenê tepiştene, înan ra nizdê 21 mengan o ke xebere nîna girewtene. Murcatê avûkatan û keyeyan seba ke ''cezaya dîsîplînî'' û ''qedexeyê pêvînayîşî'' est ê yenê astenkerdene.

Bado ke qedexeyê pêvînayîşî 15ê êlule de qedîya avûkatan 16ê êlule de reyna murcatê pêvînayîşî kerdbi. 23ê êlule de zî merdimanê tepişteyan muracatê pêvînayîşî kerdbi. La muracatî bêcewab ameyî verdayene. Dadgerîya Înfazî ya Bursa 5ê teşrîna verêne de dabi zanayene ke 9ê êlule de reyna cezaya dîsîplînî ya 3 mengan ameya dayene.

Wextê cezaya dîsîplînî 9ê kanûne de bi de û avûkatan 15 û 23ê kanûne ya 2022yî û 3ê çeleyê 2023yî de hîrê reyî muracatê zîndan û dozgerîye kerd. La nê muracatan ra zî netîce nêame girewtene.

Goreyê xebera Ajansê Mezopotamya Dadgerîya Înfazî ya Bursa avûkatî hayîdar kerdî ke 4ê çeleyî de reyna cezaya pêvînayîşê keyeyî dîyaye Abdullah Ocalan û hîrê tepişteyanê bînan. Sebebê qedexeyî sey ''cezaya dîsîplînî'' ame eşkerakerdene û la qey na ceza ameye dayene no nêame eşkerakerdene.

Avûkatan 10ê çeleyî de vera qerarî îtîraz kerd la Mehkemeya Cezaya Girane ya Bursa eynî roje îtîraz red kerd. Avûkatanê Buroyê Huqûqî yê Asrinî vat ê do vera qerarî muracatê Mehkemeya Qanûnê Bingeyî bikerê.