Hemserekê Pêroyî yê HDPyî Mîthat Sancarî gama ke kombîyayîşê îstîsnayî yê înan ê Heyetê Rayberdişî yê Merkezê Partîye dewam kerdêne eşkerayîye daye. Sancarî derheqê pênêkerdişê namzedîya serekkomarîye yê Îtîfaqê Mîletî de reya verêne qisey kerd.

Sancarî vat: ''Semedê ameyoxê demokratîk û hemparî yê şaran ma têkoşînê xo yê Rayîrê Hirêyenî xurtêr kenê. Bi xurtkerdişê hêvîya bedilnayîşî ma eşkenê nê sîstemê zextî bibedilnê û welatî biresnê roşnîye. Ma kayanê leyminan dima nêyî, ma qerardar ê ke sîyasetê demokratîkî ser bifînê. Ma wazenê krîzanê Tirkîya biqedînê û welat de haştîye înşa bikerê. Ma veng danê heme şaranê Tirkîya ke  wa derûdorê demokrasî, edalet û azadîye de bêrê têhet. Wa zerrîya şaranê Tirkîya rehet bo, ma tîya de yê, ma do pêro pîya bibedilnê. Roje roja girdkerdişê hêvî û têkoşînê hemparî ya. Ma sey HDPyî berpirsîyarîya xo zanê û qerardar ê ke na berpirsîyarîya xo bîyarê ca.''

Sancarî derheqê averşîyayîşan ê ke bado ke Sereka Pêroyî ya Îyî Partî Meral Akşaner Îtîfaqê Mîletî caverda, ameyî qewimîyayene de nê vatî:

''Verî zî xeylêk rey hetê vervatox û temsîlkaranê ma ra ame vatene ke ma na babete de kam rayîr û metodî teqîp kenê. Xora ma averşîyayîşan teqîp kenê. Ma do heyetanê xo de û bi hêzanê xo yê îtîfaqî na babete biercnê. Ma verê erdlerzî derheqê namzedîya serekkomarîye de eşkera kerdbi ke ma do senî yew rayîr teqîp bikerê. La rijnayîşê girdî yê erdlerzî ma mecbûr verdayî ke ma nê prosesî newe ra bigêrê dest. Xebatê ma yê newe ra ercnayîşê nê prosesî dewam kenê.''