Xêrê Şaredarîya Geverî ya HDPyî ra Geverî rê xizmet ame kerdene. La 2019 de dest nîya erkê Hemşaredaranê Geverî û herinda înan de qeyûm ame tayînkerdene. Qeyûmê Geverî şarî rê xizmet nêkeno.

Hemşaredarê Geverî Îrfan Sariyî dîyar kerd ke şarê Geverî qeyûmî ra bawer nêkeno û tira çîyêk nêpaweno. Sariyî vat: ''Seba şarî qeyûm karmendê dewlete bîle nîyo. Bi xespkerdişê şaredarîye qeyûmî Gever binê deynan de verda. Çimeyê şaredarîye seba faturayanê dezgehan şuxilîyenê. Qeyûm meseleyan çareser nêkeno; eqsê ci meseleyan virazeno.

Qeyûm wextê ci de çopan arê nêdano, awe bi sîstematîkî nêdano, xoza talan keno. Qeyûm zaneno ke tim serê ê kursîyî de nêbeno, peyê xo de nê meseleyan verdeno. Meseleya tewr pîle zî aw a. Seba awa werdişî zî polîtîkayêke ano ca. Mesajê 'Ma dewlet ê, hêz ê, ganî vera dewlete îtîraz çin bo' dano.''

Sariyî ard ziwan ke binê nameyê vurnayîşê şaristanî de bînayê berzî virazîyenê û vat: ''Nê bînayî siba do bibê mesele. Gever de erdlerzê muxtemelî de tehlukeyêko pîl est o. Parçeyê ke betonî ra kewenê, seba weşîya merdiman tehluke yê. Asfaltî nika ra xeripîyenê. Şar polîtîkayanê qeyûmî zaneno û firsendê verênî de do înan bişawo.''