Hemsereko verên ê Şaredarîya Hîzanî Îhsan Ugurî ke Zîndanê Amedî No 2yî de maneno, 22ê teşrîna peyên a 2022yî de seba ke tedawî bibo şî Nêweşxaneyê Perwerde û Cigêrayîşî yê Gazî Yaşargîlî. Uca de rastê embazêkê xo ame û seba ke ey reyde bi kurdkî qisey kerd, bê ke tedawî bibo eskeranê zîndanî o apey berd û dima cezaya dîsîplînî ey rê ame dayene. Îdareya zîndanî Îhsan Ugurî rê cezaya ‘‘yew aşme falîyetê sporî û sohbetî ra mehrûm mendiş’’ î daye.

Roja dişemeyî bi raya vînayîşê rî bi rî, keyeyê xo reyde qisey kerd, ‘‘Seba ke nêweşxane de mi silam da embazêkê xo eskeran ez nêberda hetê doktorî û apey arda zîndan. Seba ke mi kurdkî qisey kerd derheqê mi de zabitname ame tepîştene û tehqîqat ame kerdene. Heme îtîrazê min ê huquqîyî bê encam mendî. Peynîya tehqîqatî de mi rê cezaya ‘‘yew aşme falîyetê sporî û sohbetî ra mehrûm mendiş’’î ameye dayene.’’

14ê kanuna 2016î de Îhsan Ugur amebi destbendekerdene  û hetê Mahkemeya Cezaya Giran a Bêtlîsî ra bi îdîaya sucanê ‘‘endamîya rêxistine’’ û ‘‘propagandaya rêxistine’’ 12 serrî û 4 aşmî ceza amebî dayene.