6ê sibate de erdlerzê tesîrê 11 bajaran kerd bî û xeylê însanî merdbî. Ê bajaran ra yew zî Semsûr bî. Dewa Karaagaç a Semsûrî de dewijan dîyar kerd ke qet hetkarîyêk zî nêresaya dewijan. Dewijan da zanayene ke hewcedarîya înan a çadiran est a.

Mehmet Tanero ke erdlerzî de lajê xo yê 22 serre vindî kerd, dîyar kerd ke wextê erdlerzî de hewn de bîyo û o wirzîyayo xo eşto teber, mat mendo ke se bikero û vat, ‘‘Ê wextî de mi nêeşkîyayêne vengê xo zî biveja, mi reyêk de dî ke lajê mi ardo mi ver. Ma xelisîyayê la lajê mi merd. Ma her çîyê xo vindî kerdo keyeyê ma rijîyayê. Gere dewlete ma rê çadire bida. Çar hetê Tirkîya ra zerrîwazê hetkarîyanê bînan anê la çadirê ma çin ê.’’

Hasar Comertî zî dîyar kerd ke demê erdlerzî de ê nêeşkîyayê cilanê xo zî xo ra bidê û vat, ‘‘Ma vejîyayê teber û ma qîrayê. Êyê ke weş ê, ma ê vetî teber. Ma nêeşkîyayê dekewê bananê xo. Vewre û varan varayêne. Dima erdlerzo dîyin virazîya. Tewr zaf erdlerzê dîyinî de banî rijîyayê. Ma rê hetkarî lazim a. Çîyê ke heta nika ameyê tena yê sivîlan ê. qet hetkarîyêk zî hetê dewlete ra nêresaye ma rê.’’